Украина президенти Владимир Зеленский 2019 йил учун мол-мулк, даромадлар, харажатлар ва молиявий мажбуриятлар тўғрисидаги декларациясини тақдим этди.
Унга кўра, 2019 йилда давлат раҳбари ва унинг оиласининг даромадлари қарийб 29 млн гривень (1,06 млн АҚШ доллари) ташкил этди ва бундан Зеленский оиласи бюджетга 3,6 млн гривень (тахминан 140 минг АҚШ доллари) миқдорида солиқ тўлаган.
«2019 йил май ойидан бери Зеленский тадбиркорлик билан шуғулланмайди ва маошини фақат Давлат ишлари маъмуриятидан олади. Давлат раҳбари 2019 йил май ойидан декабргача олган иш ҳаққи миқдори 208,7 минг гривень (7,8 минг АҚШ доллар) ни ташкил қилди», — дейилади хабарда.
Қайд этилишича, ҳисобот даврида Зеленскийнинг турмуш ўртоғининг иш ҳаққи ўсиб, давлат раҳбарининг тадбиркорлик фаолиятидан олинган даромадлари камайган. Владимир Зеленский Россиядаги барча активларини сотиб юборган. Хусусан, 2019 йилнинг баҳор фаслида Green Family LTD корхонасининг акцияларини ва мамлакатда рўйхатдан ўтказилган 4 та савдо белгисидан воз кечган.
Декларацияга кўра, Зеленский ҳалигача кўплаб савдо белгиларнинг эгаси бўлишда давом этмоқдалиги маълум бўлди. Шу жумладан, 2019 йилда унинг номига иккита «Слуга народа» («Халқ хизматчиси») савдо белгиси рўйхатдан ўтказилган ва унинг номидаги барча савдо белгиларининг («Вечерний квартал», «Рассмеши комика», ва «Слуга Народа») нархи жами 1,7 млн АҚШ долларига яқин баҳоланиши маълум бўлди. Шу билан бирга, учинчи шахслар ушбу савдо белгиларидан фойдаланилгани учун Зеленский қарийб 187 минг АҚШ доллари даромад кўрган.
Шунингдек, муайян даврда Зеленский Буюк Британия ва Украинадаги бир қатор кўчмас мулкини сотгани ва ижарага кўйгани учун жами 283,7 мингдан ортиқ даромад топган.
Украина президентининг харажатлари эса асосан сайлов кампаниясига йўналтирилгани маълум бўлди. Бунинг учун, Зеленский 11,5 млн гривень (428 минг АҚШ доллари) сарфлаган ва PricewaterhouseCoopers консалтинг хизматларини тўлаш учун 21 минг АҚШ доллар харажат қилган.
Эслатиб ўтамиз, аввалроқ, Владимир Зеленский Украина президенти лавозимига киришганига бир йил ўтгани ва қилинган ишлари ва натижалари бўйича журналистлар учун катта анжуман ўтказган эди.
