Арманистон бош вазири Никол Пашинянда коронавирус инфекцияси аниқланди. Бу ҳақда бош вазир ўзининг Facebook саҳифасида маълум қилди.
Ҳукумат раҳбари ижтимоий тармоқдаги саҳифасида эълон қилган видеомурожаатида касаллик аломатлари бўлмаганига қарамай, у коронавирус тестини ўтказишга қарор қилганини айтди. «Менинг таҳлил натижаларим ижобий эканлиги аниқланди», деди у.
Таъкидланишича, унинг оила аъзолари ҳам коронавирус билан зарарланган. Пашиняннинг фикрига кўра, у музокаралар пайтида вирус билан зарарлангани гумон қилинмоқда.
«Стаканни столга қўйган официант буни қўлқопсиз қилганди. Мен ундан стаканни алмаштиришни сўрадим, аммо, менимча, официант буни олдин ҳам шундай қилган. Маълум бўлишича, ушбу официантда ҳам коронавирус инфекцияси тасдиқланган», дея маълум қилди ҳукумат раҳбари.
Никол Пашинян унинг ҳарорати юқори эмаслигини ва ўзини яхши ҳис қилаётганлигини таъкидлади. Унинг сўзларига кўра, эндиликда, у даволаниш пайтида ўз уйидан туриб ишлашни давом эттиради.
Маълумот учун, Арманистонда ҳозирда 9 282 та COVID-19 ҳолати қайд этилиб, 3 386 нафар киши соғайган, 131 нафари эса ҳаётдан кўз юмган.
