Зарафшон шаҳрида 650 ўринга мўлжалланган карантин майдони қурилиш ишлари бошланди, дея Навоий вилояти ҳокими хабар берди.

Хабарда маълум қилинишича, мазкур карантин майдонининг қурилиши давлат раҳбарияти ташаббуси билан бошланган. Ушбу қарор коронавирус инфекциясининг кенг тарқалишини олдини олиш ва шаҳарда олиб борилаётган ишлаб чиқариш жараёнларига зарар етказмаслик мақсадида қабул қилинганлиги таъкидланди.

Навоий вилояти ҳокимлиги карантин майдонининг қурилиши учун 10 гектар ер ажратилгани ва бу ерда 650 ўринга мўлжалланган 98 та контейнер жойлаштирилиши режалаштирилгани ҳақида маълум қилди.

Қайд этилишича, қурилиш ишларини бажариш учун «Zarafshan Golden Group» МЧЖ бош пудратчи этиб тайинланган.

Эслатиб ўтамиз, аввалроқ Навоий вилоятида эпидемиологиик вазият чигаллашгани сабабли карантин қоидалари кучайтирилиб, вилоятда инфекциянинг асосий учоғи бўлмиш, Зарафшон шаҳри «қизил» ҳудуд тоифасига киритилганди.