28 май куни АҚШ президенти Дональд Трамп «Онлайн цензурага йўл қўймаслик тўғрисида"ги қарорга имзо чекди. Бу ҳақда Оқ уй матбуот хизмати маълум қилди.
Маълум қилинишича, мазкур қарор ижтимоий тармоқларга ўз фойдаланувчиларининг постларини таҳрирлашга йўл қўймасликка ва фойдаланувчиларнинг сўз эркинлигини ҳимоя қилишга қаратилган.
«Сўз эркинлиги — бу Америка демократиясининг асосидир. Бизнинг таъсисчи оталаримиз ушбу муқаддас ҳуқуқни Конституцияга биринчи ўзгартириш орқали ҳимоя қилганлар. Ғояларни эркин ифода этиш ва мунозара қилиш бизнинг эркин халқ сифатида барча ҳуқуқларимизнинг асосидир», — деди Трамп.
Оқ уй раҳбарининг таъкидлашича, у Twitter, Facebook, Instagram ва YouTube каби йирик ижтимоий медия компаниялар ўзларига маъқул кўрмайдиган эркин фикрларни цензура қилишларига асло йўл қўймади, чунки бундай амалиёт демократия ва АҚШ идеалларига зиддир.
«Эркин фикр билдиришни узоқ вақтдан бери қадрлаб келаётган мамлакатда биз онлайн платформаларга америкаликлар Интернетда фақатгина ушбу платформаларга маъқул келадиган фикрларни қолдиришларига йўл қўймаймиз. Ушбу амалиёт Америка ва демократик идеалларга зиддир. Катта, кучли ижтимоий медиа компаниялари ўзларининг фикрлари билан рози бўлмаган фикрларни цензуралашса, улар хавфли кучга айланади. Уларнинг пассив алоқа майдони ролини бажарувчилик вазифаси тўхтатилади ва фойдаланувчилар контент яратувчи сифатида кўрилиши керак», — дея таъкидлаб ўтди АҚШ президенти.
Эндиликда, мазкур қарор билан Трамп федерал тартибга солувчи органларга Алоқа воситаларида одоб-ахлоқ тўғрисидаги (Communications Decency Act) қонуннинг 230-бўлимига ўзгартириш киритиш учун ваколат бермоқда. Ушбу бўлимга кўра, ижтимоий медиа компаниялари ўз платформаларида фойдаланувчилар томонидан жойлаштирилган контент учун жавоб бермайди, лекин уларга номақбул, ҳақоратли ёки зўравонликка чорловчи материалларни эркин равишда таҳрирлаш, ўчириб ташлаш, ўзгартириш ва бошқа чоралар кўриш ваколати берилади.
Трампнинг сўзларига кўра, Twitter, Facebook, Instagram ва YouTube каби компаниялар ўзларининг платформаларида ўн минглаб америкаликларнинг постларини «номақбул» деб белгиламоқда, гарчи улар ҳеч қандай қоидаларни бузмаётган бўлса ҳам. Бу, Трампнинг фикрича, цензуранинг яққол намунасидир. Мисол тариқасида АҚШ президенти Twitter ни келтириб ўтди.
«Энди Twitter маълум бир твитларга огоҳлантириш белгисини қўймоқда. Мазкур белгилар сиёсий тарафкашликни акс эттирмоқда. Маълум қилинишича, Twitter ҳеч қачон бошқа бир сиёсатчининг твитига бундай белги қўймаган», — дея эътироз билдирди Трамп.
Twitter, ўз ўрнида, мазкур қарорни «реакцион ва сиёсатлаштирилган», деб таърифлади.
Эслатиб ўтамиз, 27 май куни Twitter Дональд Трампнинг твитига биринчи маротаба ишончсиз бўлиши мумкинлиги ва қўшимча текширув кераклиги ҳақидаги махсус белги берилганди. АҚШ президенти, ўз ўрнида, Twitter ни сўз эркинлигини бўғишда айблаган эди.
