Ўзбекистонда сўнгги 14 кун ичида 49 042 нафар шахс карантинга олинган, 734 нафар фуқарода коронавирус аниқланган, дея хабар қилди Соғлиқни сақлаш вазирлиги матбуот хизмати.
Вазирлик бошқарма бошлиғи Баҳромжон Игамбердиевнинг маълум қилишича, ўтган даврда 17 та чартер рейслар билан олиб келинган 4056 нафар, чегара ўтказиш постлари орқали мамлакат ҳудудига кириб келган 11216 нафар ҳамда мулоқотда бўлганлар билан биргаликда ҳисобланганда жами 20035 нафаро фуқаро стационар карантинга олинган.
Охирги икки ҳафта ичида мамлакатда 734 нафар фуқарода коронавирус инфекцияси аниқланган бўлса, шундан 283 нафари Тошкент вилоятининг Юқоричирчиқ туманидаги Карантин марказига жойлаштирилган фуқаролар орасидан тасдиқланди.
Таҳлилларга кўра, хориждан чартер рейслар билан олиб келинганлар орасида энг кўп касалланганлар 14 май куни Санкт-Петербургдан олиб келинган фуқароларда аниқланиб, 86 нафарни ташкил этди. Чегара ўтказиш постлари орқали кириб келганлар орасида энг кўп касалланиш ҳолати эса Қозоғистондан «Ғишткўприк» чегара постидан кириб келган фуқаролар орасида аниқланди. Уларнинг сони 99 нафар.
«Шу ўринда унутмаслик керакки, айни пайтда давлат бюджетидан стационар шароитда тиббий кузатувда бўлган ҳар бир фуқаро учун бир куни учун ўртача 153 минг 700 сўм сарфланмоқда, — дея сўзида давом этди Бахромжон Игамбердиев. — 14 кунлик карантин кузатуви муддати давомида касаллик аниқланмаган ва карантин муассасасида касалланганлар билан мулоқотда бўлмаган фуқаролар махсус ажратилган транспорт воситаларида ўз манзилларига етказиб қўйилмоқда».
Стационар ва уй карантинига олиш тадбирлари бошланган илк кунлардан айни пайтга қадар карантинга олинган жами 394 181 нафар фуқародан 348 292 нафари карантиндан чиқарилган. Шундан, уй карантинига олинган 305 044 нафар фуқародан 280 006 нафари чиқарилган. Стационар карантинга олинган 89 137 нафар фуқародан эса 68 286 нафари чиқарилган.
