Facebook компанияси кичик ва йирик бизнесни қўллаб-қувватлаш учун Facebook Shops интернет-савдо платформасини ишга туширди.
Facebook Shops сотувчиларга электрон витриналар яратиш ва бир вақтнинг ўзида Facebook ҳамда Instagram билан ишлаш имкониятини беради. Бу билан Facebook кичик бизнесни COVID-19 пандемияси вақтида қўллаб-қувватламоқчи.
Келажакда компания WhatsApp ва бошқа ижтимоий тармоқларининг мессенжерларида ҳам онлайн-харидларни амалга ошириш имконини яратади. Компаниянинг таъкидлашича, бу платформа турли ҳажмдаги сотувчиларга мўлжалланган — «кичик бизнес эгасидан тортиб, халқаро брендларгача». Платформа 19 май куни ишга туширилди ва у «келгуси ойларда кенг оммага тақдим этилади».
Компания эътиборини АҚШ ва Ғарбий Европа каби ривожланган минтақаларда янги хизматни ишга туширишга қаратади, бу ерда компания сотувчилар тўғрисидаги маълумотларни ўрганиш учун зарур ресурсларга эга, дейди Марк Цукерберг.
Facebook асосчисининг сўзларига кўра, келажакда Facebook Shops платформасида сотувчиларни баҳолаш тизими ҳам пайдо бўлади. Соҳа мутахассисларининг Financial Times нашрига берган изоҳларига кўра, Facebook кўплаб функцияларни бирлаштирадиган дастурни ишга тушириш бўйича узоқ муддатли режаларга эга.
Financial Times`нинг таъкидлашича, бу хизмат — Amazon ва eBay каби йирик интернет-савдо компанияларига тўғридан тўғри рақобатчи бўла олади. Бунинг сабабларидан бири шундаки, ушбу ижтимоий тармоқда харидорга айланиши мумкин бўлган 2,6 млрд фойдаланувчи бор. Лекин Facebook бош директори Марк Цукерберг Amazon тажрибасини такрорлашга ҳаракат қилмагани, кичик бизнесга онлайн дўконларни яратишда ёрдам берадиган, таҳлиллар ва тўловлар билан шуғулланадиган Shopify каби хизматлар билан ишлашни афзал кўришини айтди.
Келгусида Facebook Shops озиқ-овқат етказиб бериш хизматларининг рақобатчисига ҳам айланиши мумкин. Цукербергнинг таъкидлашича, ушбу платформада ресторан ва етказиб бериш хизматлари бўйича таклифлар жойлаштирилса «яхши бўлар эди». Шунингдек, унинг компанияси етказиб бериш ва логистика хизматларини амалга ошириш билан ҳам шуғулланади.
Мутахассисларнинг фикрига кўра, Shops платформаси Facebook компаниясинининг электрон тижорат бозоридаги имкониятларини кенгайтиради ва компания бу соҳада жиддий иштирокчига айланади. Morgan Stanley мутахассиси Браян Новакнинг фикрича, Facebook истиқболда ушбу лойиҳа орқали «миллиардлаб доллар» ишлаб топиши мумкин. Deutsche Bank таҳлилчиси Ллойд Уолмсли эса ушбу лойиҳадан умумий фойда (реклама даромадлари ва битимлар улуши) 30 млрд долларга баҳоланаётганини таъкидлади.
