20 май соат 10:00 ҳолатига кўра, Ўзбекистонда коронавирус инфекцияси қайд этилганлар сони 2880 нафарни ташкил қилмоқда. Бу ҳақда Соғлиқни сақлаш вазирлиги хабар қилди.
Унга кўра, аниқланган янги касалланиш ҳолатларининг 5 нафари олдиндан карантинда бўлган фуқаролар, 20 нафари хориждан келган шахслар орасидан қайд этилди. 20 нафар беморнинг 5 нафари чартер рейс билан Санкт-Петербургдан, 10 нафари Қозоғистондан келган ва карантин марказига жойлаштирилган, 3 нафари халқаро юк ташувчи автомашина ҳайдовчиси, шунингдек, 2 нафари қозоғистонлик халқаро юк ташувчи автомашина ҳайдовчиси.
Бош давлат санитария инспектори Нурмат Отабеков сўзларига кўра, ҳозирда Республика бўйлаб коронавирус инфекциясидан 529 киши даволанмоқда, улардан 6 нафарининг аҳволи оғир, деб баҳоланмоқда.
Айни пайтда 48 мингдан ортиқ фуқаро карантин муддатларини ўтаяпти. Уларнинг 17 мингдан ортиқроғи стационар шароитида, қолган 31 минг нафари уй шароитида карантин тадбирлари билан қамраб олинган.
Шунингдек, Республикадаги мавжуд вирусологик лабораторияларда 528 мингтадан ортиқ тест синовлари ўтказилди. Кечаги куннинг ўзида 13 мингга яқин вирусологик текширишлар ўтказилди, деди Нурмат Отабеков.
Коронавирус инфекциясидан соғайганлар сони ҳозирда 2338 кишини ташкил этмоқда. Ўн уч киши ҳаётдан кўз юмган.
