19 май куни Россия бош вазири Михаил Мишустин коронавирус инфекциясидан бутунлай соғайиб, ҳукумат бошқарувига қайтди. Бу ҳақда РИА Новости унинг матбуот котиби Борис Беляковга таяниб хабар берди.
Эслатиб ўтамиз, 30 апрель куни Россия бош вазири Михаил Мишустинда коронавирус инфекцияси аниқланган эди. У инфекциядан даволаниши давомида унинг биринчи ўринбосари Андрей Белоусов вақтинча бош вазир вазифасини бажариб турганди.
«Михаил Владимирович даволанишини тугатди ва тиббий муассасадан бўшатилди. У ҳукумат уйида ўзини ишини бошлаб юборди. Эрталаб у ҳамкасблари билан видеоконференция режимида ишчи учрашувини ўтказди. Энди, у президент билан учрашувга тайёргарлик кўрмоқда», деди Беляков.
Маълум қилинишича, бунгача Мишустин касалхонада бўлганида видеоконференция орқали бир қатор учрашувлар ўтказган ва шунингдек, онлайн режимда Россия президенти Владимир Путин билан учрашувларда иштирок этган.
Ўз ўрнида, Владимир Путин бош вазир Михаил Мишустинни коронавирус инфекциясидан соғайгани ва ўз ишини тўлиқ бошлаши мумкинлиги билан табриклади.
«Сизни, Михаил Владимирович, ушбу вирусдан бутунлай халос бўлганингиз билан табриклайман. Сўнгги бир неча тестларингиз, менга шифокорлар айтганидек, манфий чиқди, шунинг учун сиз ишингизни тўлиқ бошлашингиз мумкин. Сиз ушбу касалликка қарамай [даволаниш пайтида] деярли тўлиқ ишладингиз. Сизни ушбу инфекцияни енгиб ўтганингиз билан табриклайман», деди Путин бош вазирга мурожаат қилиб, иқтисодиёт ва ижтимоий соҳани қўллаб-қувватлашга қаратилган йиғилишда.
Аввалроқ, короновирус инфекциясига Россия президентнинг матбуот котиби Дмитрий Песков ҳам чалинган эди. Ҳозирда у шифохонада даволанмоқда.
