18 майдан Ўзбекистонда йўловчи ҳаво ва темир йўл транспорти қатновлари қисман қайта тикланди. Бироқ самолёт ва поездга чиқиш учун йўловчилардан рейсгача 120 соат муддат ичида коронавирусга тест топшириш ва натижалар «салбий» чиққани ҳақидаги маълумотномани тақдим этиш талаби жорий этилган эди.
Аввалроқ хабар қилганимиздек, Санитария-эпидемиологик осойишталик агентлиги COVID-19 тестини топшириш нархини 224415 сўм этиб белгилаган эди.
Душанба куни Республика махсус комиссияси мазкур талабни бекор қилди. Бунда карантин шароитида аҳолининг иқтисодий ҳолати эътиборга олинди. Шунингдек, мазкур қарор қфуқароларнинг ҳудудлараро ҳаракатланишида ортиқча ноқулайликлар юзага келишининг олдини олиш мақсадида қабул қилинди.
Эндиликда юқорида кўрсатилган рейслар бўйича ҳаракатланаётган йўловчиларданкоронавирус инфекциясига тест таҳлиллари олинганлиги ҳақидаги маълумотнома талаб этилмайди.
Шу билан бирга, авиа ва темир йўл қатновларини ташкил этишда барча карантин қоидаларига амал қилиш, шу жумладан, йўловчилар сонини камайтириш, дезинфекция қилиш ва бошқа санитария талаблари сўзсиз бажарилиши талаб этилади.
