3 июнь кунидан бошлаб Италия ўзининг вилоятлари ўртасида ҳаракатланиш бўйича тақиқни ва мамлакатга кириш ва чиқишни чеклашни бекор қилмоқчи. Бу ҳақда Италия ҳукуматининг карантин тадбирларидан чиқиш қарори лойиҳасида қайд этилган.

Мазкур ҳукумат қарори лойиҳасига кўра, Италиянинг бир вилоятидан иккинчисига ўтиш 3 июндан бошлаб рухсат этилади. Бунда, фақат бирон бир ҳудудда коронавирус инфекциясиниг хавфи катта бўлган тақдирда мамлакат бўйлаб саёҳат чекланиши мумкин. Шу билан бирга, лойиҳада айтилишича, 18 май кунидан бошлаб битта вилоят ичида саёҳат чекловлари бекор қилинади.

Шунингдек, лойиҳада маҳаллий ҳокимларга ижтимоий масофаланиш тадбирини амалга ошириб бўлмайдиган ҳудудларни вақтинча ёпиб кўйиш ваколати мавжудлиги айтилган.

Маълум қилинишича, Италия расмийлари жорий чекловлар юмшатилиши ҳақидаги қарорни 17 май куни эълон қилиши кутилмоқда.

Маълумот учун, Ж.Конте ҳукумати март ойи ўрталарида карантин жорий этилиши билан минтақалар ўртасида ва уларнинг ичида ҳаракатланишни сезиларли даражада чеклаб қўйган эди. Сафарлар фақат иш зарурати бўлганида, соғлиқ учун ёки фавқулодда вазиятларда мумкин эди.

Эслатиб ўтамиз, аввалроқ, Словения Европада биринчи бўлиб мамлакатда коронавирус эпидемияси якунига етганини эълон қилган эди.