Ўзбекистонда тасдиқланган коронавирус ҳолатлари сони 2547 тага, ушбу инфекциядан соғайганлар эса 2040 нафарга етди. Айни пайтда соғайган ва вафот этганлардан ташқари, жами 497 бемор даволанмоқда.
Кун давомида 61 та янги COVID-19 ҳолати қайд этилди. Бу кўрсаткич бир кун муқаддам 68 тани ташкил этган эди.
Айни пайтда 42 мингдан ортиқ фуқаро карантин муддатларини ўтаяпти. Уларнинг 13 мингдан ортиқроғи стационар шароитида, қолган 29 минг нафари уй шароитида карантин тадбирлари билан қамраб олинган.
13 май 06:00 дан бошлаб Самарқандда карантин қоидалари кучайтирилиши эълон қилинди. Унга кўра, шаҳарда стикерсиз автомобиль бошқариш тақиқланади. Фақатгина озиқ-овқат дўконлари, деҳқон бозорлари ва дорихоналарнинг фаолият кўрсатилишига рухсат берилади.
Шунингдек, 13 майдан 24 майга қадар фуқароларни хориждан олиб келиш бўйича чартер рейслар ташкиллаштириши маълум бўлди. Ушбу рейслар Истанбул, Санкт-Петербург, Деҳли, Ростов-Дон, Қозон, Москва, Лондон, Новосибирск ва Шаржа шаҳарларидан амалга оширилади.
«Фарҳод» бозорида коронавирусга гумон қилинган фуқарода касаллик аниқланмади. Шу кунларда бозорда дезинфекция ишлари амалга оширилмоқда ва уларнинг якунига кўра бозор ишга тушиши режалаштирилган.
