АҚШда ишсизлик даражаси 20 фоизгача кўтарилиб, 1930 йиллардаги «Буюк Депрессия» даражасига етиши тахмин қилинмоқда. Бу ҳақда The Washington Post хабар берди.

10 май куни АҚШ президенти Трампнинг икки юқори даражали иқтисодий маслаҳатчилари — Оқ уйнинг иқтисодий масалалар бўйича маслаҳатчиси Кевин Хассетт ва Ғазначилик котиби Стивен Мнучин АҚШда коронавирус пандемияси давом этаверган ҳолда ишсизлик даражасининг кўтарилаши ва июнь ойида ишсизлик кўрсатгичи 20 фоизгача юқорилаши мумкинлигини маълум қилишди.

АҚШ Меҳнат вазирлигининг сўнгги ҳисоботига кўра, мамлакат иқтисодиёти апрель ойида 20,5 миллион иш ўрни йўқотиб жами ишсизлик даражаси 14,7 фоизга етди. Бу, ўз ўрнида, 1930 йиллардаги «Буюк Депрессия» давридан бери энг юқори кўрсатгичдир.

Шунингдек, Оқ уйнинг иқтисодий масалалар бўйича маслаҳатчиси Кевин Хассетт CBS News нашрига берган интервьюсида ишсизлик даражаси нафақат кўтарилиши, балки ишидан айрилганлар қачон ишга қайтишини ҳеч ким билмаслигини таъкидлаб ўтди. Ғазначилик котиби Стивен Мнучин эса Fox News Sunday га АҚШ учун жорий йилнинг иккинчи чораги биринчи чорагидан ҳам қийинроқ бўлишини кутиш кераклигини айтиб ўтди.

«Бу иқтисодий инқироз Америка бизнесининг айби эмас, бу америкалик ишчиларнинг айби ҳам эмас ва бу вируснинг айбидир», деди Мнучин.

Бундай салбий тенденцияларга қарамай, Мнучин иқтисодиёт тикланишига умид билдирди. У Трампнинг иқтисодиёт тармоқларинининг фаолиятини босқичма-босқич қайта йўлга қўйиш ҳақидаги чақириқларига жавобан сентябрь ойидан бошлаб меҳнат бозори ўзини тиклаб олиши кераклигини таъкидлади.