11 май куни Олий Мажлис Сенати тўртинчи ялпи мажлисида Ўзбекистоннинг Евроосиё иқтисодий иттифоқи (ЕОИИ) билан ҳамкорлигини маъқуллади.
100 сенатордан 91 нафари овоз беришда иштирок этди. Шулардан 71 нафари қарорни маъқуллади, 16 киши «қарши», 4 киши бетараф бўлди.
Сенат раиси Танзила Норбаева Ўзбекистоннинг ижтимоий-иқтисодий ривожланиши билан боғлиқ ушбу муҳим масала икки йилдан бери муҳокама қилинишини таъкидлади.
Халқаро муносабатлар, ташқи иқтисодий алоқалар, хорижий инвестициялар ва туризм масалалари қўмитаси раиси Равшанбек Алимов ЕОИИ нефть ва газ қазиб олиш бўйича дунёда биринчи, минерал ўғитлар ишлаб чиқариш бўйича иккинчи, темир йўлларнинг умумий узунлиги бўйича учинчи, электр энергияси ишлаб чиқариш бўйича тўртинчи ўринда эканлигини маълум қилиб ўтди. Ушбу ташкилот билан ҳамкорлик ташқи савдо ҳажмининг ўсиши, мамлакатда йирик инвестиция лойиҳаларини амалга ошириш, ҳудудий кластерлар, саноат ва савдо зоналарини ташкил этишда минтақалараро алоқаларни ривожлантириш имкониятларини янада кенгайтиришини айтиб ўтди.
Шу билан бирга, интеграциянинг Ўзбекистон тармоқлари учун камчиликлари мавжуд. «Яъни, муайян даврда маҳаллий ишлаб чиқарувчилар маҳсулотлари нархларининг ошиши, уларнинг рақобатбардошлигига салбий таъсир қилиши ҳамда ички бозорда импорт маҳсулотлари ҳажми кўпайиши билан боғлиқ салбий жараёнлар хавфи борлиги аниқланди. Бундан ташқари, республиканинг савдо сальдоси ва тўлов баланси ҳолати ёмонлашиши хавфи мавжуд», — деди Равшанбек Алимов.
У Ўзбекистоннинг Евросиё иқтисодий иттифоқида (ЕОИИ) кузатувчи давлат сифатида иштирок этишини тасдиқловчи Сенат қарори лойиҳасини тақдим этди.
Сенатнинг Бюджет ва иқтисодий ислоҳотлар масалалари қўмитаси раиси Эркин Гадоевнинг таъкидлашича, божхона қонунчилигини унификациялаш ва ЕОИИ ичидаги товарлар ҳаракати билан боғлиқ божхона тўловларини камайтиришнинг олдини олиш чораларини ишлаб чиқиш, шунингдек, маҳаллий тадбиркорлар, айниқса, кичик бизнесни, уларни молиявий ҳолатининг пасайиши ва импорт қилинадиган товарларнинг ички рақобатга салбий таъсирини ҳисобга олган ҳолда қўллаб-қувватлаш кераклигини таъкидлади. У, шунингдек, иттифоққа киришнинг барча хавф-хатарлари билан яхшироқ танишиш ва таҳлил қилиш учун кузатувчи давлат сифатида иштирок этишни маъқуллашни таклиф қилди.
Сенаторлар Ўзбекистоннинг ЕОИИда «кузатувчи давлат» мақомида иштирок этиш таклифини маъқуллашди ва мазкур масала бўйича Олий Мажлис Сенатининг тегишли қарори қабул қилинди.
Ўзбекистон конституциясига мувофиқ, Сенат томонидан маъқулланган қонун президент томонидан имзоланганидан сўнг расмий кучга эга бўлади.
Эслатиб ўтамиз, 28 апрель куни Олий Мажлис Қонунчилик палатаси депутатлари Ўзбекистоннинг Евроосиё иқтисодий иттифоқига кузатувчи сифатида киришини маъқуллаган эди. Шунда, 150 депутатдан 132 нафари овоз беришда иштирок этиб, улардан 86 депутат «рози», 32 нафари «қарши» ва 14 нафар депутат бетараф бўлиб овоз беришганди.
