АҚШ президенти Дональд Трамп унинг Эронга қарши ҳарбий ваколатларини чеклайдиган Конгресс резолюциясига вето қўйди. Бу ҳақда Оқ уй расмий сайтида хабар берилди.
«Бугун мен Конгресснинг S.J. Res. 68 резолюциясига вето қўйдим. Бу резолюция мендан АҚШ Қуролли кучларининг Эронга қарши ҳарбий ҳаракатлардан фойдаланишни чегаралашни талаб қилади. Бу демократлар томонидан 3 ноябрь куни бўлиб ўтадиган сайловда республикачилар партиясини ажратиш стратегияси доирасида киритилган жуда ҳақоратли қарор», — деди Трамп ушбу резолюция ҳақида.
Президент сўзларига кўра, мазкур резолюция фактлар ва қонунларни нотўғри талқин қилишга асосланган ва унда таъкидлагандан фарқли ўлароқ, АҚШ Эронга қарши куч ишлатиш билан шуғулланмайди.
«Тўрт ой олдин мен Қоссим Сулаймоний Ироқда бўлганида уни йўқ қилиш учун қатъий чоралар кўрдим. Эрон бунга жавобан Ироқда жойлашган бизнинг кучларимизга бир қатор ракеталарни учирди. Ушбу ҳужумлардан ҳеч ким ҳалок бўлмади. Бундан ташқари, Сулаймонийга қарши куч ишлатиш қонун томонидан, жумладан, 2002 йилдаги Ироққа қарши ҳарбий кучлардан фойдаланиш тўғрисидаги рухсатномада ва Конституциянинг 2- моддасида тўлиқ тасдиқланган», — деди Оқ уй раҳбари.
Шунингдек, Конгресснинг ушбу резолюцияси қабул қилинганда, унинг АҚШ иттифоқчилари ва шерикларини таҳдидлардан ҳимоя қилишига жуда катта зарар етказиши мумкин эди, дейилади хабарда.
«Ва ниҳоят, ушбу резолюция президентнинг АҚШ, унинг иттифоқчилари ва шерикларини ҳимоя қилиш ваколатларига катта зарар етказган бўлар эди. Резолюцияда президентнинг ҳарбий куч ишлатиш бўйича конституциявий ваколати АҚШ ва унинг кучларини яқинлашиб келаётган ҳужумдан ҳимоя қилиш билан чекланган. Бу нотўғри. Биз ўзгарувчан таҳдидлар дунёсида яшаяпмиз ва Конституция президент душманларимизнинг кейинги ҳаракатларини олдиндан кўра олиши ва уларга жавобан тезкор ва қатъий чоралар кўриши кераклигини тақозо этади. Мен эса ҳудди шундай қилдим!» — дея таъкидлади Дональд Трамп.
The Washington Post нашрининг ёзишича, мазкур ҳуқуқий ҳужжат асосан демократ сенатор Тим Кейн томонидан илгари сурилган бўлиб, Конгресснинг иккала партиясида ҳам қўллаб-қувватланган. Чунки йил бошида Трамп топшириғи билан Бағдодда Эроннинг юқори даражадаги ҳарбий қўмондони Қоссим Сулаймоний ва Ироқ милицияси раҳбарининг учувчисиз самолёт ҳужуми билан ўлдирилиши Яқин Шарқда жуда таҳдидли вазиятни юзага келтирган эди. Шу боис, резолюция биринчи маротаба 13 февраль куни республикачилар назоратидаги Сенатда 55/45 овозлар билан қабул қилиниб, иккинчи маротаба 11 март куни қуйи палатада янги демократлар етакчилиги билан 227/186 овоз билан Конгрессдан ўтган эди.
АҚШ Конституциясига асосан президент Конгрессдан ўтган қонун лойиҳасига вето қўйиши мумкин. Аммо Конгресс резолюциясининг Оқ уйга етказилиши деярли икки ойга кечиктирилди, чунки Конгресс коронавирус пандемияси туфайли Вашингтонни тарк этганди.
«Конгресс бу қарорни қабул қилмаслиги керак эди», — дея Трамп ўзининг вето қарорига хулоса ясади.
