Германия май ойининг иккинчи ярмида футбол бўйича асосий чемпионат ҳисобланган Бундеслига ўйинларини якунига етказиб қўйишни режалаштирмоқда, дея хабар қилди ТАСС агентлиги.
«Майнинг иккинчи ярмида гигиена қоидаларига риоя қилинган ҳолда ўйинларни ўтказиш мумкин», — дея эълон қилди Германия канцлери Ангела Меркель чоршанба куни ФРГ федерал ерлари ҳукуматлари билан маслаҳатлашувлар якунлари бўйича.
У бу ҳақда Германия каоронавирус пандемиясининг биринчи босқичидан ўтиб бўлганини эълон қилганидан сўнг маълум қилди. Қайд этиш керакки, Германия ҳозирда касаллик ҳолатлари сони бўйича дунёда олтинчи ўринда. Мамлакатда 168,1 минг киши COVID-19 инфекциясига чалинган бўлиб, уларнинг қарийб 140 минг нафари соғайган.
Аввалроқ Германия Меҳнат вазирлиги бир қатор шартлар билан футбол чемпионатини қайта тиклашни таклиф қилган эди. Жумладан, профессионал футбол жамоалари футболчилари ниқобларда ўйнашлари керак. Бунда гап оддий кундалик ниқоблар эмас, балки тиббий стандартларга асосланган махсус ниқоблар ҳақида кетмоқда. Улар бурун ва оғизни ҳимоя қилиши шарт. Ниқоблар ўйин вақтида тушиб кетмаслиги, ўйинчилар эса уларга тегинмаслиги керак.
Март ойида пандемия туфайли Германия чемпионати тўхтатилгунига қадар Мюнхеннинг «Бавария», Дортмунднинг «Боруссия» ва «РБ Лейптсиг» пешқадамлик қилаётган эди. Чемпионатнинг тўққиз тур учрашувлари қайд этилмаган.
Англия ва Италия клублари ҳам мамлакат турнирларини якунламоқчи. Англия футбол чемпионати ҳукумат рухсати билан ўтказилади. 13 март куни тўхтатилган турнир ўйинлари номаълум муддатга қолдирилган эди. Ҳозирда чемпионат жадвалида «Ливерпул», «Манчестер Сити» ва «Лестер» пешқадамлик қилишмоқда.
Италия чемпионатининг барча 20 жамоаси ҳам бир овоздан коронавирус пандемиясига қарамай мавсумни якунлаш истагида. Eurosport хабарига кўра, бунинг учун фақат расмий ҳукумат рухсатномаси талаб қилинади. Карантин пайтида Италияни тарк этган клуб ўйинчилари мамлакатга қайтмоқдалар, уларнинг ушбу мамлакатда ўзини ўзи изоляция қилиш даврини ўтказган ҳамкасблари эса аллақачон машғулотларга киришмоқдалар. Ҳозирда «Ювентус», «Лацио» ва «Интер» пешқадамлик қилмоқда.
Францияда чемпионат муддатидан олдин якунланди, апрель ойининг охирида етакчи бўлган Парижнинг «Пари Сен-Жермен» жамоаси чемпион деб тан олинди, дея қайд этди ТАСС.
