30 апрель куни Россия бош вазири Михаил Мишустинда коронавирус инфекцияси аниқланди. Бош вазирнинг биринчи ўринбосари Андрей Белоусов унинг ўрнига вақтинча бош вазир вазифасини бажариб турадиган бўлди. Бу ҳақдаги тегишли қарор Владимир Путин томонидан имзоланди.
«Газета.uz» Андрей Белоусовнинг сиёсий фаолияти ҳақидаги маълумотларни келтириб ўтади:
Андрей Белоусов (1959 йилда туғилган) — Россия давлат арбоби, иқтисод фанлари доктори. У кўп йиллардан бери Владимир Путиннинг ёрдамчиси сифатида фаолият юритган ва унинг тарафдорларидан ҳисобланади.
Белоусов давлат хизматини 2006 йилда иқтисодий ривожланиш вазири ўринбосари лавозимида бошлаган. Бунгача у Макроиқтисодий таҳлил ва қисқа муддатли прогнозлаш маркази асосчиси ҳамда раҳбари сифатида Давлат Думасининг иккита ихтисослашган қўмитасида эксперт, бош вазирнинг мустақил маслаҳатчиси лавозимларида фаолият олиб борган. Шунингдек, ҳукумат ҳамда Давлат кенгаши дастурий ҳужжатларини ишлаб чиқишда қатнашган.
2008 йили ўша пайтдаги бош вазир Владимир Путин Белоусовни Россия ҳукуматининг Иқтисодиёт ва молия бўлими директори этиб тайинлаган. У 2008 йилдан 2012 йилгача Россия ҳукуматининг иқтисодий кун тартибини шакллантиришда муҳим ролга эга бўлган.
Белоусов 2012 йилдан 2013 йилгача — Медведев ҳукумати вақтида иқтисодий ривожланиш вазири бўлган. 2013 йилдан 2020 йилга қадар эса Россия президентининг иқтисодий масалалар бўйича ёрдамчиси сифатида фаолият кўрсатиб келган.
2020 йил 21 январь куни Белоусов Россия бош вазирининг биринчи ўринбосари лавозимини эгаллаган.
Шунингдек, Белоусов 2015 — 2018 йиллар давомида «Роснефть» компаниясининг директорлар кенгаши раиси бўлган. 2020 йили март ойидан Россия темир йўллари («РЖД») Давлат корхонасининг директорлар кенгаши раиси бўлиб келмоқда.
Экспертларнинг фикрига кўра, Белоусов иқтисодиётни миллийлаштириш, яъни ҳокимиятнинг иқтисодиётга аралашуви тарафдори. 2018 йил август ойида Андрей Белоусовнинг металлургия ва кимё заводларидан 513 миллиард рубл миқдоридаги ортиқча даромадни давлат бюджетига ўтказиш ғояси катта резонансга сабаб бўлган эди. Бироқ ҳукумат унинг бу фикрини рад этди. Кейинчалик ортиқча даромадни олиш ўрнига, бизнес давлатнинг йирик ва муҳим инвестиция лойиҳаларида қатнашиши маълум қилинган.
2018 йилда Андрей Белоусовнинг йиллик даромади умумий 7,675 млн рублни, унинг турмуш ўртоғининг даромади эса 11,164 млн рублни ташкил этган.
Расм тарихини ўрганиш ва атлетик фитнес билан шуғулланишга қизиқади. Оилали, икки фарзанди бор.
