Ўзбекистон президенти Шавкат Мирзиёев 27 апрель куни «Коронавирус пандемияси даврида аҳоли ва тадбиркорлик субъектларини қўллаб-қувватлаш бўйича қўшимча чора-тадбирлар тўғрисида"ги фармонни имзолади.

«Ўзбекистон 24» телеканалининг хабар қилишича, 16,5 минг нафар пенсионерлар 20 млрд сўм миқдорида ортиқча тўланган пенсиядан қарздорликка эга. Президент фармони билан пенсиялар тўғри тайинланиши ҳамда тўланиши бўйича текширишлар натижасида аниқланган, ортиқча тўланган пенсиялар бўйича 20 апрель ҳолатига пенсионерларнинг қарздорлик суммаси ҳисобдан чиқарилмоқда.

Қайд этилишича, Ўзбекистонда 155 минг нафар ишладиган пенсионерлар пенсияларини иш жойидан олмоқда. Уларга ҳар ойда қўшимча 195 млрд сўм тўланмоқда. Ҳужжатда белгиланганидек, 1 майдан бошлаб барча ишловчи пенсионерларга (Давлат бюджети ҳисобидан пенсия олувчи шахслардан ташқари) пенсиялар тўлови тўғридан-тўғри Молия вазирлиги ҳузуридаги бюджетдан ташқари Пенсия жамғармаси орқали амалга оширилади.

«Авваллари ишлайдиган пенсионерлар пенсияларини бир ой кейин оларди, яъни апрель ойи пенсиясини улар май ойида олишлари керак эди. Ҳужжатда тўловларнинг майдан бошлаб тўғридан-тўғри Пенсия жамғармасидан олишлари кўзда тутилмоқда ва ўз-ўзидан май ойида икки ой учун — ҳам апрель, ҳам май ойи учун пенсия олишади», — дея аниқлик киритди молия вазири ўринбосари Дилшод Султонов.

Президентнинг 3 апрелдаги фармони билан пандемия оқибатлари фаолиятига салбий таъсир кўрсатган микрофирмалар, кичик корхоналар ва якка тартибдаги тадбиркорлар учун солиқларни тўлаш бўйича фоизсиз кечиктириб (бўлиб-бўлиб тўлаш) бериш муддати 1 октябргача кечиктирилган эди. Янги фармон билан мазкур муддат 31 декабргача узайтирилади.

Маҳаллий давлат ҳокимияти органларига кечиктириш (бўлиб бўлиб тўлаш) берилган ва келгусида тўланадиган солиқ суммаларини тўлаш бўйича муддатни мустақил равишда, бироқ икки йилдан оширмасдан белгилаш ҳуқуқи берилди.

Бундан ташқари, лизинг корхоналари томонидан ҳисобланган ва кечиктирилган лизинг бўйича фоиз даромадлари суммаси фойда солиғини ҳисоблашда кечиктириш берилган даврдаги жами даромад таркибига киритилмайди.

Тижорат банкларининг кредитлари бўйича фоиз харажатларини Тадбиркорлик фаолиятини қўллаб-қувватлаш Давлат жамғармаси томонидан компенсация қилиш тартиби тадбиркорлик субъектларининг амалдаги кредит шартномаларига ҳам татбиқ қилинади.

Аввалроқ президент хайрия маблағлари учун имтиёзларни тасдиқланганини хабар қилган эдик.