Ўзбекистонда ягона электрон чипта сотиш тизимини жорий этиш бўйича Вазирлар маҳкамаси қарори лойиҳаси эълон қилинди.
Маданият вазирлиги томонидан муҳокамага жойлашатирилган қарор лойиҳасига кўра, ягона электрон чипта сотиш порталининг ягона оператори МЧЖ шаклида ташкил этилиши кўзда тутилмоқда.
Лойиҳада қайд этилишича, маданият вазирлиги ҳузуридаги Маданият ва санъатни ривожлантириш жамғармаси ҳамда «Ягона республика процессинг маркази» МЧЖ (Uzcard) Операторнинг муассислари ҳисобланади. Uzcard 51 фоиз улуш билан ва жамғарма 49 фоиз улуш билан оператор устав капиталида иштирок этишади.
Оператор томонидан электрон чипталарни сотиб олиш учун сайт яратилади ва унинг фаолияти юритилади. Чипта сотиш бўйича кўрсатилган хизматлар учун операторга воситачилик ҳақини ундириш ҳуқуқи берилади.
Сайтда чипталарни брон қилиш, сотиш ва қайтариш, агентларни улаш хизматлари йўлга қўйилади.
Ягона тизим «Ўзбекистон темир йўллари», «Uzbekistan airways», «Ўзавтовокзал сервис» ДУК ва республика ҳудудидаги барча автовокзаллар ва йўловчилар автостанциялари, спорт объектлари ва бошқа чипта сотиш ахборот тизимларини интеграция қилади.
Қарор лойиҳасининг муҳокамаси 9 майга қадар давом этади.
