Қозоғистон Марказий банки юридик шахсларнинг банк ҳисоб рақамларидан нақд пул ечиш бўйича шартларни ўзгартирди, дея хабар берди назоратчи матбуот хизмати.

1 июндан бошлаб лимит кичик бизнес учун — ойига 20 млн тенге (46 минг долларга яқин), ўрта бизнес учун — ойига 120 млн тенге (тахминан 275 минг доллар), йирик бизнеслар учун — ойига 150 млн тенгени (344 минг долларга яқин) ташкил этади. Мазкур чегарадан ортиқча нақд пулларни ечиш учун эса компаниялардан асос келтириб бериш талаб қилинади.

Чекловлар қишлоқ хўжалиги озиқ-овқат маҳсулотлари савдоси билан шуғулланувчи ҳамда озиқ-овқат маҳсулотлари, ичимликлар, фармацевтика ва тиббий буюмларнинг чакана савдоси билан шуғулланадиган якка тартибдаги тадбиркорлар, кичик тадбиркорлик субъектлари, юридик шахсларга нисбатан татбиқ этилмайди.

Марказий банк раиси ўринбосари Дина Галиева янгилик яширин иқтисодиётга қарши курашиш, бизнес субъектлари амалга ошираётган операциялар шаффофлигини ошириш ҳамда пул ювишга қарши туришга қаратилган.

«2017 йилда юридик шахслар банк ҳисобварақларидан 1,6 трлн тенге, бир йил ўтиб — 2,4 трлн тенге, 2019 йилда — 2,8 трлн тенге ечиб олди. Нақд қилинаётган маблағлар миқдори йилдан-йилга ўсиб бормоқда. Шу билан бирга, тадбиркорларнинг ўзлари таъкидлаганидек, ушбу маблағлар маълум товарлар ва турли хизматлар учун тўлаш учун ишлатилади. Компаниялар бундай операцияларни нақдсиз усулда амалга оширишлари ҳам мумкин — ҳеч қандай чекловлар йўқ», — дея Дина Галиева сўзларини келтиради informburo.kz.

Марказий банк раҳбари ўринбосари 2019 йилда бир юридик шахс йилига ўртача 9 млн тенге, ойига эса 747 минг тенге нақдлаштиришини қўшимча қилди. Жорий этилаётган лимитлар эса ушбу кўрсаткичдан баланд.