Дунёнинг энг машҳур уй жиҳозлари сотадиган IKEA дўконларининг эгаси Ingka Group компанияси карантиндан кейин кўплаб чақалоқлар дунёга келишини (бэби-бум) кутаётганлигини, шу боис болалар жиҳозларини ишлаб чиқаришга инвестиция киритишини маълум қилди. Бу ҳақда Reuters хабар берган.
Маълумотга кўра, коронавирус пандемияси туфайли, компаниянинг сотувлари 60 фоизга қисқарган.
Ingka Group бош директори Йеспер Бродиннинг айтишича, карантин вақтида онлайн харидлар сони ўтган йилга нисбатан икки маротаба кўпайган, баъзи мамлакатларда эса ўн маротаба ошган. Даниядаги дўконлар карантиндан олдинги сотувлар даражасига қайтган.
Одамлар уйда қолаётганликлари сабабли ошхона жиҳозлари кўпроқ харид қилинмоқда. Лекин компания болалар учун жиҳозларга катта инвестиция киритишни режалаштирмоқда.
Йеспер Бродиннинг фикрига кўра, 7 ёки 8 ойдан сўнг бэби-бум бўлиши, яъни кўплаб янги чақалоқлар туғилишини кутиш мумкин. Шу боис у бозорда етарлича таклиф бўлиши кераклигини айтган. «Олдинги инқирозлар ҳам бэби-бумга олиб келган», — деди Бродин.
Унинг айтишича, компания дўконларида арзонроқ жиҳозларга бўлган талаб нисбатан ошган. Бродин ушбу ҳолат карантиндан кейин ҳам давом этишини кутиш мумкинлигини айтган, чунки одамлар кўп пул йўқотишади.
Компаниянинг ўз фаолиятини қайта тиклаган Хитойдаги дўконларда савдо бир йил олдинги сотувлар даражасига қайтган. Ухань шаҳридаги дўконлар яқин ҳафталарда очилиши айтилган.
2019 йилнинг август ойи кўрсаткичларига кўра, компаниянинг бир йиллик савдоси 36,7 млрд еврога тенг бўлган, бундан 11 фоизи онлайн савдога тўғри келади.
