Буюк Британия соғлиқ сақлаш вазири Метт Хэнкок Оксфорд университети олимлари томонидан ишлаб чиқилган вакцина 23 апрель куни одамларда синовдан ўтказиш бошланишини эълон қилди. Бу ҳақда BBC хабар берди.
Хэнкок брифингда: «коронавирусни енгишнинг энг яхши усули, бу — вакцинадир», — деди. Вазир мазкур жараён «синов ва хато» орқали бўлиб ўтишини, Буюк Британия вакцинани яратиш бўйича «глобал ҳаракатларнинг бошида» экани ва бошқа мамлакатларга қараганда бунга кўпроқ пул сарфлаганини таъкидлаб ўтди.
Брифингда Буюк Британиядаги Империал коллежи ва Оксфорд университети томонидан яратилган коронавирусга қарши вакциналарни клиник синовларини қўллаб-қувватлаш учун жами 42,5 миллион фунт стерлинг ажратилиши маълум қилинди.
«Ҳар икки истиқболли лойиҳа ҳам жадал ривожланмоқда ва олимларни қўллаб-қувватлаш учун қўлимиздан келган барча ишни қиламиз», — деди қироллик соғлиқни сақлаш вазири.
