Германия канцлери Ангела Меркель келгуси ҳафтадан карантин чоралари қисман олиб ташланишини маълум қилди. У Берлинда мамлакатнинг барча федерал ерлари раҳбарлари билан учрашувда бу ҳақда эълон қилди, дея хабар берди РКБ Bloomberg ахборотига таянган ҳолда.

Ҳозирча майдони 800 квадрат метрдан ошмайдиган дўконлар, китоб дўконлари ва велосипед дўконларининг очилишига рухсат берилади. 4 майдан бошлаб мактабларда ўқиш қайта тикланиши, сартарошхоналар ҳам ўз ишини бошлаши кутилмоқда.

Ангела Меркел одатий ҳаётга тўлиқ қайтиш учун бир неча ҳафта ёки ойлар кутилиши мумкинлигини маълум қилди. Ресторанлар, барлар, кинотеатрлар, меҳмонхоналар ва фитнесс клублари ёпиқ қолади, черков хизматлари тақиқланади. Томошабинлар иштирокидаги оммавий тадбирлар ва футбол ўйинлари қайта тикланиши август ойи охиригача бошланмайди.

Германияликлардан ҳали ҳам ижтимоий масофани сақлаб туриш талаб қилинади. Шунингдек, дўконларда ва жамоат транспортида тиббий ниқоб кийиш тавсия этилмоқда.

Германия коронавирус билан касалланганлар энг кўп тасдиқланган давлатлар бешлигига киради — 16 апрель куни эрталаб бу кўрсаткич 134,7 минг кишини ташкил қилди. Шу билан бирга, коронавирус билан боғлиқ бўлган асоратлардан ўлим ҳоллари бу ерда Европанинг бошқа мамлакатларига ва АҚШга қараганда пастроқ — 3800 тадан кўпроқ.