Ўзбекистон Марказий банки чоршанба куни 16 апрелдан кучга кирадиган валюталарнинг сўмга нисбатан курсини янгилади.

АҚШ доллари 427 сўмга ошиб, 10121 сўмга етган бўлса, евро 512 сўмга кўтарилди ва 11111 сўмни ташкил этди, рубл эса 7 сўмга қимматлаб, 139 сўмлик кўрсаткични қайд этди.

Бу курсларнинг ҳафта ичида иккинчи марта кўтарилишидир. Одатда, Марказий банк томонидан белгиланган валюта курслари ҳафтада бир марта — ҳар сешанба куни янгиланади.

Сешанба куни кечқурун Ўзбекистон тижорат банклари доллар курсини кескин равишда 10 минг сўмдан оширди.

Шу куни Марказий банк ўзининг асосий ставкасини йиллик 16 фоиздан 15 фоизга туширди.