ОПEК ва Россия нефть қазиб олишни рекорд даражага қисқартириш тўғрисидаги шартномани қайта кўриб чиқиб, қазиб олиш ҳажмини кунига 10 млн баррель ўрнига 9,7 млн баррелгача камайтиришга келишиб олди. Бу ҳақда ОПЕК ташкилотининг расмий сайтида хабар берилди.
12 апрель куни ОПЕК ташкилотига аъзо давлатлар ҳамда аъзо бўлмаган ОПЕК+ гуруҳи мамлакатлари иштирокида ўнинчи фавқулодда йиғилиш бўлиб ўтди. Унда умумий нефть қазиб олиш кўрсаткичи 9 апрелда эришилган келишувга нисбатан қайта кўриб чиқилди. Якунда нефть қазиб олиш ҳажмини 1 майдан 30 июнга қадар кунига 9,7 млн баррелгача камайтириш ҳамда энергетика бозорини барқарорлаштиришга қаратилган саъй-ҳаракатларга ўз ҳиссасини қўшишга келишиб олдилар.
Қайта кўриб чиқилган келишувга кўра, давлатлар 1 июлдан 31 декабргача нефть қазиб олиш кўрсаткичини 7,7 млн баррелгача қисқартиради. Ундан сўнг, режага мувофиқ, 2021 йил 1 январдан 2022 йил 30 апрелгача (16 ой давомида) давлатлар томонидан келишилган ҳолда кунига 5,8 млн баррелгача камайтиришга келишилди. Мазкур шартноманинг амал қилиш муддати 2022 йил 30 апрелгача белгиланган.
Мазкур шартнома тарихий аҳамиятга эга, чунки ОПЕК ва ОПЕК+ давлатлари ўз тарихида илк маротаба нефть қазиб олиш ҳажмини рекорд даражада пасайтириш тўғрисида келишиб олдилар.
Шартномага асосан дунёда нефть ишлаб чиқаришнинг умумий пасайиши тахминан 20 миллион баррелга етади ва бу глобал нефть таъминотини 20 фоизга пасайтириши мумкин. Тадқиқотчилар фикрига кўра, бу ўз ўрнида, нефть нархининг аста-секин кўтарилишига олиб келиши керак, аммо коронавирус пандемияси ортидан ёқилғиларга талаб пасайиши сабабли мазкур келишув нефть нархини кўтариш учун етарли бўлмаслиги мумкин.
Муълумот учун, аввалги музокаралар Мексиканинг келишув шартларига рози бўлмагани сабабли тўлиқ кучга кирмаган эди. Бу сафар Мексика келишувга қўшилди. Эндиликда Мексика ўзининг нефть қазиб олиш кўрсаткичини ойига 400 минг баррел ўрнига атига 100 минг баррелга қисқартиради.
