Fitch Ratings халқаро рейтинг агентлиги Ўзбекистоннинг узоқ муддатли кредит рейтингини «BB-» даражасида (спекулятив хусусиятларга эга бўлган рискли мажбуриятлар) сақлаб қолди. Рейтинг бўйича прогноз — «барқарор», дейилади агентлик пресс-релизида.

Таҳлилчилар Ўзбекистон рейтинглари барқарорлигини мамлакатнинг кучли ташқи ва фиксал (солиқ-бюджет) буферлари, диверсификацияланган экспорт базаси ва ташқи молиялаштириш имкониятларидан фойдалана олиши билан асослади. Мазкур омиллар, Fitch фикрича, мамлакатнинг COVID-19 келтириб чиқарган инқирозни енгиб ўтиш учун молиявий чораларга мослашувчанлигини таъминлайди.

Агентлик мамлакат ҳукумати макроиқтисодий барқарорлик ва ўсиш истиқболларини таъминлаш, иқтисодиётда давлат ролини камайтириш ҳамда институционал ва бошқарув муаммоларини бартараф этиш учун 2017 йилда бошланган ислоҳотлар дастурини амалга оширишда ҳали ҳам қатъиятли, деб ҳисоблайди.

Fitch дунё иқтисодий истиқболларининг ёмонлашуви, пул ўтказмалари ҳажмининг пасайиши ва коронавирус тарқалишининг олдини олиш бўйича чоралар оқибатида 2020 йилдаги иқтисодий ўсиш 2019 йилдаги 5,6 фоиздан 2 фоизгача тушишини тахмин қилмоқда.

Ўз навбатида, таҳлилчилар инвестицион лойиҳаларнинг молиялаштирилиши, инқирозга қарши чоралар ҳамда Россия ва Хитой иқтисодиётининг тикланиши пандемия оқибатларини юмшатиши ва 2021 йилда иқтисодиётдаги ўсишнинг 6,8 фоиз даражасига етишига сабаб бўлишини тахмин қилмоқда.

«Ўзбекистоннинг ёш аҳолиси, инвестициялар даражасининг юқорилиги ва ислоҳотлар инқироздан кейинги даврда қулай ўсиш истиқболларини қўллаб-қувватлайди», — деб ҳисоблайди агентлик.

Fitch прогнозларига кўра, давлат қарзи ЯИМнинг 34,3 фоизига қадар ошади. Бунда кафолатланган қарзлар ЯИМнинг 10,1 фоизини ташкил этади. 2019 йилда эса бу кўрсаткичлар мос равишда 28,5 фоиз ва 8,7 фоизни ташкил этган.