18 апрель куни хусусий оролда ўтказилиши режалаштирилган UFC-249 халқаро мусобақаси ESPN ва Disney компанияларининг талаби билан вақтинчалик қолдирилди. Бу ҳақда UFC расмий сайтида маълум қилинди.

Хабарга кўра, UFC ташкилоти ушбу мусобақани давом эттиришга тўлиқ тайёр эди, бироқ мусобақани эфирга узатиш бўйича эксклюзив ҳуқуққа эга бўлган ESPN коронавирус пандемияси сабабли ушбу тадбирни ва кейинги курашларни кейинга қолдиришни талаб қилди.

«Мен шанба куни жангларни бошлашга тайёр эдим, лекин Disney ва ESPN мендан жангларни тўхтатишни сўрашди. Мен улар билан шериклигимни ҳурмат қиламан, шунинг учун тадбирни қолдиришга қарор қилдим», деб маълум қилди Дана Уайт The Associated Press-га ёзган тасдиқлаш хатида.

Маълумот учун, UFC аралаш жанглар промоутери президенти Дана Уайт UFC 249 халқаро мусобақасини хусусий оролларда томошабинларсиз ўтказишни режалаштирган эди. Жанглар ESPN Plus стриминг хизматида эфирга узатиш бўйича эксклюзив ҳуқуққа эга бўлган эди.