Ўзбекистонда коронавирусдан соғайганларнинг қон зардобларини оғир аҳволдаги COVID-19 беморлари қуйиш орқали вирусга қарши кураш усулини жорий этиш бошланади. Бу ҳақда Соғлиқни сақлаш вазирлиги хабар қилди.

«Соғайган фуқароларимизнинг қон зардоби касалликни бошидан кечираётган беморларимиз учун ниҳоятда бебаҳо бўлиб, уларнинг ушбу хасталикни енгил ўтказиши ва тезроқ тузалишлари учун замин бўлиб хизмат қилиши мумкин», — дейилади хабарда.

Қайд этилишича, бу усулни мамлакатдаги бир қатор тажрибали олим ва шифокорлар билан келишилган ҳолда жорий этиш бошланади.

Вазирлик амалиётнинг илмий асоси сифатида COVID-19 инфекциясига чалинган беморлар қон зардобида вирусга қарши иммун таначалар пайдо бўлиши ҳамда улар вируснинг ўлимига олиб келишини келтириб ўтди.

Бунда коронавирус инфекциясидан тузалган инсонлардан зардоб олишдан олдин, бир нечта инфекцияларга текширилади, тиббий кўрикдан ўтказилади. Қўшимча инфекцияси ва касаллиги бўлмаган инсонлар зардобининг кичик бир қисми олинади. Сўнгра йиғиб олинган зардоб яна қўшимча ишлов бериш жараёнларидан ўтказилиб, касаллик оғир кечаётган беморлар розилиги ва шифокор кўрсатмалари ҳамда махсус тартибларга қатъий риоя қилинган холда қўлланилиши мумкин.

«Энг муҳими, COVID-19 инфекциясидан тузалган инсонларнинг қон зардоби — касаллик оғир кечаётган ёки узоқ давом этаётган беморларимизга вирусни тезроқ ва осонроқ енгиш учун қўшимча курашиш манбаи бўлиб хизмат қилади», — дейилади хабар сўнгида.