Ўзбекистонда коронавирус тарқалишидаги кузатилган 94 та ҳолатда инфекция чет элда бўлиб қайтган фуқароларда аниқланган. Бу ҳақда Санитария-эпидемиологик осойишталик агентлиги директори Баҳром Алматов брифингда маълум қилди.
Соғлиқ сақлаш вазирлиги таҳлил натижаларига кўра, касаллик 94 та ҳолатда чет элда бўлган фуқароларда аниқланган ҳамда улардан кетма-кетликда тарқалган 440 та ҳолатда фуқаролар касал бўлган. Шу ўринда, хориждан келган ушбу 94 нафар фуқародан тарқалиши мумкин бўлган 100 мингдан ортиқ аҳолининг тўлиқ рўйхати шакллантирилиб, ҳар бири бўйича алоҳида-алоҳида суриштириш ишлари, профилактик чора-тадбирлар амалга ошириб келинмоқда.
Суриштирув натижасида чет элдан юқтириб келган фуқаролар орқали 40 та корхона, ташкилотларда ишлайдиган ҳамкасбларига юқтирганлик ҳолатлари аниқлангани аён бўлди.
Шунингдек, Баҳром Алматов республикадаги мавжуд лабораторияларда шу кунга қадар 78 906 та намуна COVID-19 коронавирус инфекциясига текширилгани ҳамда ССВ ҳузурида ташкил қилинган Штаб томонидан ушбу касалликнинг эпидемиологик суриштирув ишлари бўйича электрон тизим яратилгани ҳақида маълумот берди.
Мазкур электрон дастурда беморнинг паспорт маълумотлари, иш жойи, касаллик белгилари дастлаб намоён бўлган кундан бошлаб у билан мулоқотда бўлган кишилар рўйхати шакллантирилади.
«Беморлар билан боғлиқ бўлган ҳолатлар, ушбу касаллик кимдан юққани, кимларга юқиш хавфи бор, шуларни ўрганилиб, касаллик тарқалишининг олдини олиш бўйича барча тадбирлар амалга оширилади», — деди Баҳром Алматов.
Маълумот учун, 10 апрель кунига қадар эпидемик вазият нохуш бўлган ҳудудлардан келган ва беморлар билан мулоқотда бўлган 84,281 нафар фуқаро саломатлиги устидан тиббий назорат ўрнатилган. Улардан 63 951 нафари уй шароитида, 21 780 киши 202 та муассасада стационар шароитда карантинга олинган.
