Ўзбекистон Бош прокуратураси Фарғона вилояти Ёзёвон туман тиббиёт бирлашмасининг туғруқ бўлимида ҳомиладор аёлнинг вафот этгани юзасидан жиноий иш қўзғатилганини маълум қилди.
Ижтимоий тармоқларда MY5 телеканалининг 33 ёшли Н. Ш. нинг туғруқхонада вафот этганига бағишланган телелавҳа тарқалди. Видеода аёлнинг турмуш ўртоғи туғруқ вақтида унга ҳеч ким ёрдам бермаганини маълум қилган.
«Бурнидан қон келиб ўлиб ётибди. Умуман ёрдам кўрсатилгани йўқ. Нимага мен ойнани синдирдим? Ўзи каллам жойида, кесин врачлар, деб синдирдим. Унгача ҳеч қайси доктор келгани йўқ. Бир соатдан кейин мана шу бош шифокорни прокуратура чақириб олиб келди», — деди у.
Марҳуманинг қариндоши шифохонадаги барча акушер врачларнинг нафақага чиққанини таъкидлади.
«Туғруқхонамизда тўртта акушер шифокор бўлса, ҳаммаси пенсияга чиққан. Берсин ёшларга ўрнини. Шу ёшларга ойна бўлсин, пул олмасин, коррупция бўлмасин. Шу коррупция йўқ бўлса, шу ўлимлар ҳам бўлмайди», — деди у.
Яна бир қариндош аёлнинг тахминича, Н. Ш. ни туғруқхонада ташқи кўринишига қараб қабул қилишни хоҳлашмаган.
«Булар қишлоқнинг одамлари, (яхши) кийинмай борган. Буларнинг афт-ангорига қараб, улардан ҳеч қандай маблағ чиқмаслигини билган. Шунинг учун бефарқ бўлишган. Шу докторнинг жазосини олишини сўраймиз», — деди у.
Марҳуманинг онаси қизини бир неча марта туғруқхонага олиб боргани, бироқ бир марта ҳам акушер шифокорни учратмаганини сўзлаб берди. Унинг сўзларига кўра, ҳамшира ҳомила ҳали «очилмаган экан», дея уйга қайтариб юборган.
Туман шифохонаси ходимининг айтишича, Н. Ш. соғлом бўлган, таҳлилларни ўз вақтида топширган ва ўзини яхши ҳис этган.
Яна бир эркак тиббиёт ходими (тахминан, туғруқхона бош шифокори) аёлнинг касалхонага олиб келинганидан 10−15 дақиқа ўтиб вафот этганини маълум қилди. У ўлим сабабларини аниқлаш учун текширувлар якунларини кутиш кераклигини таъкидлади.
Лавҳада қайд этилишича, Н. Ш. нинг яна икки фарзанди бўлган.
Бош прокуратуранинг аниқлашича, 33 ёшли аёл туғруқ пайтида (39 ҳафталик ҳомиласи билан) вафот этган.
Ҳолат бўйича қатор тергов ҳаракатларини ўтказмасдан туриб, қонуний тўхтамга келиш имконияти йўқли сабабли 4 апрель куни Жиноят кодексининг 116-моддаси (Касб юзасидан ўз вазифаларини лозим даражада бажармаслик) билан жиноят иши қўзғатилган. Ҳозирда тергов ҳаракатлари олиб борилмоқда.
