Ўзбекистонда аниқланган коронавирус ҳолатлари сонининг кейин ўсиши тестлаштиришнинг кенгайтирилгани билан боғлиқ, дея маълум қилди душанба куни соғлиқни сақлаш вазири Алишер Шодмонов «Ўзбекистон 24» телеканалига берган интервьюсида.
Унинг сўзларига кўра, фақатгина 5 апрелнинг ўзида COVID-19 инфекцияси борлигини аниқлаш бўйича 4700 дан ортиқ тест ўтказилган ва 76 та ҳолат аниқланган.
«Жаҳон соғлиқни сақлаш ташкилоти, БМТ раҳбарлари: „Тезкорлик билан тестлаштириш ўтказган давлатларда [инфекция юқтирганлар] тезда аниқланади ва изоляция қилинади, шифохонага жойлаштирилади, ўз вақтида даволанади, у ерда натижа бўлади ва вирус кенг тарқалишининг олди олинади“, — дейишмоқда. Шунинг учун биз барча имкониятлардан фойдаланган ҳолда барча карантин зоналарида, аҳолининг риск гуруҳларида бундай тестлаштиришни кучайтирдик. Фақатгина кечанинг ўзида биз 4737 та тест ўтказдик ва 76 та ҳолатни аниқладик», — деди вазир.
Коронавирус инфекциясини эрта аниқлаш эпидемиологик вазиятни янада ёмонлашишига йўл қўймайди, деди у. Бу ҳолда, оқибатлар янада ёмонлашиши мумкин, дея қўшимча қилди у.
Алишер Шодмоновнинг таъкидлашича, беморларда коронавирус касаллик инкубация даврининг турли кунларида аниқланади.
«2−3 кун ва 4−5 кун ичида вирус аниқланганлар ҳам бор. Халқаро тажрибага асосланиб, шунингдек, инкубация даври 14 кун эканлигини ҳисобга олган ҳолда, вирус 12, 13 ва 14- кунларда аниқланади. Бу 14 кун давомида одамларни карантинга қўйиш тўғрисидаги қарорнинг тўғри эканлигини яна бир бор исботлайди. Бугунги кунга келиб 50676 киши карантиндан чиқарилди, уларга касаллик ташхиси қўйилмаган», — деди вазир.
