«Юксалиш» умуммиллий ҳаракати раиси ўринбосари ва Ўзбекистон Олий Мажлис Қонунчилик палатаси депутати Бобур Бекмуродов ҳукуматга дори воситалари ва тиббий ниқобларни экспорт қилишни таъқиқлашни таклиф қилди.
Либерал-демократик партия (ЎзЛиДеП) фракцияси депутати ортиқча ваҳимага ҳожат йўқлигини, лекин янги коронавирус билан касалланиш ҳолатлари 70 дан зиёд давлатларда тасдиқлангани ҳамда касалланганлар сони 100 мингга яқинлашиб қолганини таъкидлади.
У глобализация шароитида вирусдан изоляцияда қолиш имконияти мавжуд эмаслиги тобора ойдинлашиб бораётганини маълум қилди. Депутат фуқаролар хавфсизлигини таъминлаш мақсадида қуйидаги таклифларни илгари сурди:
- оммавий тадбирларни ўтказишни чеклаш, болалар ва ёшлар иштирокида оммавий тадбирларни таъқиқлаш;
- транспорт қатновлари чекланган ёки йўловчиларини карантинга олиш назарда тутилган давлатлар рўйхатини кескин кенгайтириш;
- вирус билан курашишга кўмаклашувчи дорилар ва шахсий ҳимоя воситалари (маскалар, респираторлар) экспортини тақиқлаш ва зарур бўлса хавфсиз давлатлардан импортини қўллаб-қувватлаш;
- фармацевтика бозорини қатъий назоратга олиш, вирусдан ҳимояланиш ва даволаш воситалари нархининг спекулятив ошишига йўл қўймаслик;
- янги коронавируснинг олдини олиш бўйича ТИВ, ССВ ва Инвестиция вазирлари иштирокида парламент эшитувини ўтказиш;
- боғча ва мактабларда касалланиш хавфининг олдини олишга қаратилган чораларни кучайтириш.
Аввалроқ Жаҳон соғлиқни сақлаш ташкилоти раҳбари Тедрос Гебрейесус COVID-19 коронавирусининг ўлимга олиб келиши даражасини 3,4 фоиз эканини маълум қилган эди. Бу кўрсаткич мавсумий гриппда бу 1 атрофидани ташкил этади.
Россия ва Германия ниқоб ва респираторларни мамлакатдан олиб чиқишни тақиқлади. Франция ҳукумати эса аҳолини ҳимоя маскалари билан таъминлашни назоратга олди. Жаҳон Банки ушбу вирус билан курашиш учун 12 миллард доллар маблағ ажратишини маълум қилди.
