Саудия Арабистони ҳукумати Маккада умра (кичик ҳаж) қилиш ва Мадинадаги Пайғамбар масжидига ташриф буюриш мақсадида мамлакатга киришни тўхтатди. Бу ҳақда Қироллик Ташқи ишлар вазирлиги баёнотида сўз боради.
Ушбу қарор COVID-19 коронавирусининг тарқалишини олдини олиш чоралари доирасида қабул қилинди.
Ташқи ишлар вазирлиги, шунингдек, «янги коронавируснинг тарқалиши хавфли бўлган» мамлакатларнинг фуқаролари учун туристик визалар билан кириш тўхтатилишини эълон қилди.
Жаҳон соғлиқни сақлаш ташкилотининг статистик маълумотларига кўра, 26 февраль ҳолатида коронавирус инфекциясининг 38 давлатда тарқалган. Дунё бўйича касалланганларнинг умумий сони — 81,1 минг кишини ташкил этмоқда, 2,7 мингдан ортиқ одам вафот этган.
