Ўзбекистон ҳудудига Кавказ районларидан кирган антициклон билан Қорақалпоғистон ва Хоразм вилоятида 27 январь куни эрталаб қисқа муддатли ёғингарчилик (ёмғир, қор) кузатилди, дея хабар қилди Ўзгидромет матбуот хизмати.
Куннинг иккинчи ярмида республиканинг айрим жойларида кучсиз ёғингарчилик (ёмғир, қор) бўлиши мумкин, фақат жанубда ва Фарғона водийси вилоятларида ёғингарчилик бўлмайди. Кундузги ҳарорат 2−7 даража атрофида бўлиши кутилмоқда, бу кўрсаткичлар кун меъёрларига яқиндир.
Ҳафтанинг кўп қисмида мамлакат ҳудуди ана шу антициклон чегараси таъсирида бўлади. Шу сабабли республикада кам булутли об-ҳаво кузатилади, ҳавонинг совиши тунги ҳарорат 0−5 даража совуққача тушишига олиб келади, кундузи эса қуёш нурлари ҳароратни 4−9 даражагача илитади.
Иш ҳафтасининг охирига келиб юқори босимли майдон чекинади ва Туркманистон ҳудудидан чиқадиган нам ҳаво оқими натижасида об-ҳаво анча илийди. Тунги совуқ ҳам кучсизлашади, манфий ҳароратлар ўрнини 0−5 даража илиқ эгаллайди, кундузи эса 7−12 даража илиқ бўлади.
Ҳафта сўнггида ўртача кўп йиллик ҳароратлар меъёрий кўрсаткичлардан 4−5 даражага юқори бўлади.
