Ўзбекистон ҳукумати 2018 йил октябрь ойидан бошлаб Россия Ички ишлар вазирлигининг чет эл фуқароларини вақтинча сақлаш марказларидаги 3323 фуқаронинг ўз уйларига қайтишларига ёрдам берди, деб хабар берди «Газета.uz» мухбири.
Бу ҳақда 23 январь куни журналистларга Ўзбекистон Бандлик ва меҳнат муносабатлари вазирлиги Ташқи меҳнат миграцияси ва қайтган меҳнат мигрантларнинг реинтеграция дастурлари бошқармаси бошлиғи Дилмурод Исақулов маълум қилди.
2018 йил сентябрь ойида Москвада бўлиб ўтган иқтисодий ҳамкорлик бўйича Ўзбекистон-Россия ҳукуматлараро комиссиясининг 19-йиғилишидан сўнг, Россия чет эллик фуқароларни вақтинчалик марказларида бўлган 1500 нафар Ўзбекистон фуқаросини қайтаришда кўмаклашиш тўғрисида келишувга эришилди. Биринчи 71 киши ўша йилнинг октябрь ойидаёқ қайтиб келди.
«[3323 кишидан] 2000 нафардан кўпроғи — 2019 йилда. Бир ярим минг — бу биз тўхтаб қолган рақам эмас. Биз буни давом эттирмоқдамиз», — деди Дилмурод Исақулов келишувларнинг бажарилишига изоҳ берар экан.
Меҳнат вазирлиги вакили чет эл фуқаролари Россия бюджети ҳисобидан бундай марказлардан чиқариб юборилишини эслатиб ўтди. «Шу сабабли биз ушбу маблағларни ажратиш учун ҳар доим вақт кераклигини тушунамиз», деди амалдор. У: «Биз фуқаромиз бир кун ҳам ортиқча қолмаслигини таъминлашга ҳаракат қилмоқдамиз», — дея қўшимча қилди.
Собиқ меҳнат вазири Шерзод Кудбиев аввалроқ журналистларга Ўзбекистон томони Россиянинг исталган жойидаги чет элликларни сақлаш марказларидан ўз фуқароларини олиб келиш учун тўлиқ ҳажмда молиялаштиришга тайёр эканини маълум қилган эди. Хусусан, вазирлик ҳужжатларини йўқотган муҳожирларга республиканинг Россиядаги элчихонаси ва бош консулхоналарида Ўзбекистон фуқаролигини тасдиқлаш жараёнлари учун тўловларни ўз ҳисобидан амалга оширишни режалаштирмоқда.
Ҳозирги вақтда 33 миллиондан ортиқ аҳолиси бўлган Ўзбекистондан ташқарида 2,5 миллионга яқин киши, шу жумладан Россияда 2 миллионга яқин киши ишламоқда.
