Ўзбекистон «Миллий тикланиш» демократик партияси етакчиси Алишер Қодиров Жиззах вилоятидаги 36-Пахтакор сайлов округидан депутат этиб сайланиш учун керакли миқдордаги овозларни тўплай ололмади. У овоз беришнинг иккинчи босқичида иштирок этиши керак, дея хабар берди партия вакили «Газета.uz»га.
Душанба куни «Газета.uz» мухбири билан суҳбатда Алишер Қодиров соат 00:30 ҳолатида, дастлабки маълумотларга кўра, у 71,2 фоиз овоз олганини айтди. «Агар бошқа участкаларда натижалар ўзгармаган бўлса, мен ғалаба қозондим. Аммо мен ҳамма нарсага тайёрман. Агар қайта сайлаш бўлса, демак бу ҳам яхши», — деди у.
Округда Гулзод Зухурова (ЎзЛиДеП), Малоҳат Мустафоева («Адолат»), Соҳибжон Содиков (ЎзХДП) ва Феруза Қобилова (Экологик партия) Алишер Қодировнинг рақиблари эди. Гулзода Зухурова беш номзоддан энг кўп овоз тўплаган Алишер Қодиров билан биргаликда иккинчи босқичга ўтди.
Жиззах вилоятидаги жами олтита округдан фақат биттасида Ўзбекистон Халқ демократик партиясидан депутат сайланди, қолганларида эса иккинчи тур ўтказилади.
Марказий сайлов комиссияси маълумотларига кўра, 150 сайлов округидан 128 тасида парламент қуйи палатасига депутатлар сайланган. 22 та округда икки ҳафта ичида такрорий сайловлар бўлиб ўтади.
Бошқа партияларнинг етакчилари ўз сайлов округларида ғолиб бўлишди: Актам Хаитов, ЎзЛиДеП — Қашқадарё вилояти 136-Деҳқонобод округидан, Наримон Умаров, «Адолат» — Сурхондарё вилояти 82-Шўрчи округидан, Улуғбек Иноятов, ЎзХДП — Наманган вилояти 53-Янгиқўрғон округидан ва Борий Алихонов, Экопартия — Навоий вилоятининг 39-Қизилтепа округидан сайланди.
Эслатиб ўтамиз, ўтган сайловларда ЎзЛиДеП — 43, «Миллий тикланиш» — 35, «Адолат» социал-демократик партияси — 21, Халқ демократик партияси — 18 ва Экопартия — 11 ўринни эгаллади.
