2020 йил 1 апрелдан бошлаб Ўзбекистонда фуқароларни қўлга олиш бўйича ҳаракатларни уларнинг процессуал ҳуқуқлари тушунтирилган ҳолда мажбурий видеотасвирга олиш жорий этилади. Бу президентнинг 13 декабрдаги Конституция ва қонун устуворлигини таъминлаш, жамиятда жамоатчилик назорати ва ҳуқуқий маданиятни оширишга қаратилган қароридан ўрин олди.
Ҳозирда қонунчиликка тинтув, ҳодиса жойида кўрсатма олиш ва тергов эксперименти каби процессуал жараёнларни видеоёзувга қайд этиш тўғрисидаги талаблар мустаҳкамланган.
Қарор билан ҳуқуқни муҳофаза қилиш органлари ходимлари шахсни қўлга олгандан кейин зудлик билан қўлга олинганнинг оила аъзолари, улар бўлмаган тақдирда эса қариндошлари ёки яқин кишиларини хабардор қилиши лозим.
Ҳужжатга кўра, 2020 йил 1 июлдан бошлаб қўлга олинганлар ҳамда уларнинг ҳуқуқларини чекловчи процессуал чоралар билан боғлиқ бошқа ҳаракатларни ҳисобга олиш электрон тизими жорий этилади.
Эслатиб ўтамиз, президент Шавкат Мирзиёев 7 декабрь куни Констиция қабул қилинганининг 27 йиллигига бағишланган маросимда ушбу ташаббусни илгари сурган эди. Давлат раҳбари ўшанда ҳуқуқни муҳофаза қилиш органлари фақат халқ манфаатларига хизмат қилиши лозимлигини таъкидлаган эди.