22 декабрь куни бўлиб ўтадиган Ўзбекистон Республикаси Олий Мажлисининг Қонунчилик палатасига ва маҳаллий кенгашларга сайловда муддатидан олдин овоз бериш 12 декабрь куни соат 9:00 да бошланади ва 18 декабрь куни соат 18:00 да якунланади.
Марказий сайлов комиссияси раисининг ўринбосари Маҳмуд Истамовнинг сўзларига кўра, 10 декабр куни ўтказилган брифингда мамлакатда 10,2 мингта сайлов участкаси, Ўзбекистоннинг чет элдаги дипломатик ваколатхоналари ва консуллик муассасаларида 55 та тайёрланди (сайлов участкалари рўйхати Ташқи ишлар вазирлиги веб-сайтида мавжуд).
9 декабрь ҳолатига кўра, сайловчиларнинг ягона рўйхатига киритилган сайловчилар сони 20,529 миллиондан ошди. Улардан 18,739 миллион (91,3%) Ўзбекистондаги ва 1,79 миллион (8,7%) чет эл сайлов участкаларига бириктирилган.
Муддатдан олдин овоз бериш учун 936 мингдан ортиқ сайлов бюллетенлари тайёрланди, бу сайловчилар умумий сонининг 5 фоизини ташкил этади, деди у.
Сайловчилар рўйхатини текшириш жараёни 8 декабрда якунланди. «Сайловчилар ўз яшаш жойларидаги сайлов участкаларига ташриф буюришлари, сайловчилар рўйхатларини кўришлари ҳамда уларнинг маълумотлари сайловчилар рўйхатига киритилгани ва уларнинг тўғри киритилганлигини текширишлари мумкин», — деди Маҳмуд Истамов.
