Қозоғистонда нефть маҳсулотларини автомобилларда олиб чиқишга олти ойлик тақиқ жорий этилди. Қозоғистон энергетика, ички ишлар, молия вазирликлари ва Миллий хавфсизлик қўмитаси имзолаган қўшма буйруқ 2 ноябрдан кучга кирди.

Бунда автомашиналарнинг завод бензин бакларида ва ҳажми 20 литрдан ошмаган идишларда ёқилғи олиб чиқиш мумкин.

Октябрь ойида энергетика вазири Канат Бозумбоев Tengrinews нашрига берган интервьюсида тақиқнинг бензин нархи арзонлиги билан боғлиқ эканини қайд этган эди.

«Россия билан чегарамиздан минглаб машиналар ўтиб, бензин қуйишади. Майли, бакларини тўлдиришади. Бироқ енгил машиналар ўнлаб канистрларни тўлдиради, транзит юк машиналари 3−4 тоннагача бўлган қўшимча бакларига қуйиб олишади. Бизнинг минглаб тонна бензин, дизел ёқилғиларимизни чегарадош давлатларга ташиб кетишмоқда. Яъни, биз бегона иқтисодиётларга субсидия киритмоқдамиз», — деган эди вазир ўшанда.

Октябрда Қозоғистон АЁҚШларида АИ-92 русумли бензиннинг бир литри 150−155 тенге (3750 сўм атрофида) нархда сотилди.