АҚШ президенти Дональд Трамп якшанба куни «Ислом давлати» гуруҳи етакчиси Абу Бакр ал-Бағдодий Суриянинг Идлиб вилоятида ўтказилган махсус операция натижасида йўқ қилингани хабарини берди. Дональд Трампнинг бу борадаги баёноти Оқ уй веб-сайтида эълон қилинди.
«Кеча Америка Қўшма Штатлари дунёнинг биринчи рақамли террорчисини адолат қўлига топширди. Абу Бакр ал-Бағдодий вафот этди. У дунёдаги энг шафқатсиз ва бераҳм террорчилик ташкилотининг асосчиси ва раҳбари эди», — деди АҚШ президенти.
Унинг сўзларига кўра, АҚШ Бағдодийни кўп йиллардан бери қидираётган эди. «Бағдодийни қўлга олиш ва йўқ қилиш менинг миллий хавфсизлик соҳасидаги бошқарувимнинг энг муҳим устувор вазифаси эди. АҚШ махсус операцион кучлари ушбу вазифани бажариш учун Суриянинг шимоли-ғарбий қисмида хавфли ва мардонавор тунги ҳужумни ўтказди», — деди у.
Дональд Трамп Америка Қўшма Штатлари операция давомида бирорта ҳам аскарини йўқотмагани, Бағдодий билан бирга кўп сонли жангарилар ва шериклари йўқ қилинганини таъкидлади. ИД етакчиси чиқиш иложи бўлмаган туннелда «йиғлаб, фарёд уриб ва қичқирганча» ўлдирилди, деди у. Бу вақтга келиб террорчи жойлашиб олган бино аллақачон бўш эди: унинг ичидаги одамларнинг бир қисми ўлдирилди, қолганлари таслим бўлди. Уйдан 11 бола олиб чиқилди. Уч нафар болани эса Бағдодий ўзи билан «ўлим чангалида» олиб қолди.
АҚШ президенти Бағдодий ўзини ўзи портлатганини айтди. Унинг шахсини аниқлаш учун ўша жойда ДНК таҳлили ўтказилди. Амалиёт якунлари бўйича АҚШ ҳарбийлари бинода икки соат давомида қолиб, «жуда қимматбаҳо материаллар ва маълумотларни» қўлга киритган.
Дональд Трамп операция бошқа давлатлар — Россия, Туркия, Сурия ва Ироқ, шунингдек, суриялик курдларнинг ёрдамисиз амалга ошириб бўлмаслигини таъкидлади.
«У қадар азоб-уқубат ва ўлимларга сабаб бўлган шафқатсиз қотил зўрлик билан йўқ қилинди — уэнди ҳеч қандай бегуноҳ эркак, аёл ва болага зарар етказмайди. У итдай ўлди. У қўрқоқ каби ўлди. Дунё энди анча хавфсиз бўлди», — дея хулоса қилди АҚШ президенти.
Ал-Бағдодий (ҳақиқий исми Иброҳим Авад Иброҳим ал-Бадрий) Ислом давлатининг раҳбари сифатида 2014 йилда Яқин Шарқда «Исломий халифалик» ташкил этилганини эълон қилганида танилган эди. Аввал ҳам унинг йўқ қилингани ҳақида бир неча бор хабар берилган.
РИА Новости хабарига кўра, Россия Мудофаа вазирлиги АҚШ ҳарбий хизматчилари томонидан Бағдодийни йўқ қилиш учун амалиётлар ўтказилгани тўғрисида ишончли маълумотларга эга эмас. Бундан ташқари, Мудофаа вазирлигининг таъкидлашича, Россия Америка авиациясининг Сурия ҳаво ҳудудига ўтишини қулайлаштирганидан хабардор эмас.
