Испания Олий суди душанба куни 12 нафар сиёсатчига нисбатан 2017 йилда ноқонуний референдум ўтказганлик ва ҳудудий парламент мустақиллигига етакчилик қилгани муносабати билан суд ҳукмини чиқарди. Тўққиз нафар сиёсатчи исён чиқаришда айбдор деб топилиб, 9 йилдан 13 йилгача муддатга озодликдан маҳрум этилди. Яна уч нафари эса жаримага тортилди. Суд ҳукми ўқилганидан сўнг оммавий норозилик намойишлари бошланди, дея хабар қилди Новости ахборот агентлиги.
Автоном ҳамжамият мустақиллиги учун курашаётган Assemblea Nacional Catalana ва Omnium Cultural жамоат ташкилотлари тарафдорларини Барселона, Таррагона, Лерида ва Жиронада ги испан ҳукумати ваколатхоналари биноларига боришга чақирмоқда. Энг мураккаб вазият Барселонада вужудга келган, у ердаги намойишларда 40 минг киши қатнашди.
Полиция намойишчиларни Барселонадаги Испания ваколатхонаси биносидан узоқлаштирди, бироқ улар қўшни кўчаларга ўтишди. Митинг уюштираётганлар ҳуқуқ-тартибот ходимлари йўлига тўсиқлар қўйиш мақсадида контейнерларни ағдариб, картон, чиқиндиларга ўт қўймоқдалар. Натижада кўчада оловли девор ҳосил бўлди.
Барселона аэропорти тартибсизлар марказига айланган, бу ерда намойишчилар полиция билан тўқнашди. Намойишчилар ҳаво бандаргоҳига яқинлашиб, терминаллардан бирига кирди. Бир неча минг киши терминал йўлини тўсиб қўйган бўлса, яна бир неча минги бино ичида ўтирган ҳолда намойиш ўтказди. Митингчилар ҳаттоки аэропорт йўлини ҳам тўсиб қўйди, бир муддат поездлар ва «Эл-Прат» аэропортигача метро ҳаракати тўхтаб қолди. «Эл-Прат» аэропортида амалга оширилиши режалаштирилган 936 та рейснинг энг камида 45 таси бекор қилинди. Бир қисм рейслар кечиктирилди — экипаж ва йўловчилар самолётга қадар етиб бора олмади.
Тартибсизликларда 130 нафардан ортиқ киши жароҳатланди. Энг кўп — 115 киши — аэропортдаги акциялар чоғида жароҳат олди. Жабрланганлардан бири кўзидан жароҳат олгани сабабли шифохонага ётқизилди.
Каталония ҳукумати Барселона аэропортидаги тартибсизликлар вақтида маҳаллий ҳуқуқни муҳофаза қилиш органлари хатти-ҳаракатлари устидан текширув ўтказмоқчи.
Халқаро қидирувга берилган Каталония женералитетининг собиқ раҳбари Карлес Пучдемон Каталония мустақиллиги тўғрисида янги референдум ўтказишга чақирди.
