Транспорт вазирининг биринчи ўринбосари Илҳом Маҳкамов бошчилигидаги вазирлик делегацияси Германиянинг Мюнхен шаҳрида бўлиб ўтаётган аэропортларга хизмат кўрсатиш соҳасидаги Inter Airport Europe 2019 халқаро кўргазмасида иштирок этди. Бу ҳақда вазирлик матбуот хизмати «Газета.uz»га хабар қилди.
22-маротаба ташкил этилган кўргазма ҳаво транспорти техникасини ривожлантириш, аэропорт ва терминаллар учун ускуналар, аэродромларда ишончлилик ва хавфсизлик, самолётларга техник хизмат кўрсатиш каби масалаларни қамраб олган. Кўргазма доирасида аэропорт фаолиятининг долзарб масалалари бўйича семинар ва давра суҳбатлари бўлиб ўтмоқда.
Кўргазманинг биринчи куни делегация вакиллари Inter Airport Europe 2019 кўргазмасида қатнашиб, аэропортлар соҳасида хизмат кўрсатиш бўйича ишлаб чиқилган энг сўнгги техника ва технологиялар билан яқиндан танишишди.
Ташрифнинг иккинчи куни гуруҳ аъзолари Европанинг илғор ривожланиб бораётган Мюнхен аэропортининг тажрибаси билан яқиндан танишишди. Аэропортга уюштирилган ташриф давомида унинг инфратузилмаси, бу ерда ишлатилаётган ускуналар ва аэропорт ишини ташкил этиш борасида қўлланилаётган технологик ечимлар борасида батафсил маълумот берилди.
Шу куни аэропортнинг конференциялар залида Мюнхен аэропортининг ривожланиш концепсияси мавзусида махсус тақдимот бўлиб ўтди. Тақдимот сўнгида Илҳом Махкамов Мюнхен халқаро аэропортининг бошқарувчи директори Ральф Гаффал билан музокаралар олиб борди. Музокаралар натижасига кўра Ўзбекистонлик кадрларни Мюнхен халқаро аэропортида амалиёт ўташи ҳамда миллий кадрлар учун аэропортлар бошқаруви бўйича Германияда махсус ўқув курсларини ташкил қилишни йўлга қўйиш бўйича келишувга эришилди.
Мюнхен аэропорти ҳозирда Германиядаги Франкфуртдан кейин иккинчи ўринда турувчи Европадаги энг йирик хаблардан бири бўлиб, 2018 йил давомида 368 минг тоннадан ортиқ юкларни қайта ишлаган, 46,3 миллион йўловчи ҳамда дунёнинг 74 мамлакатининг 264 шаҳридан келувчи 413 мингдан ортиқ парвозларга хизмат кўрсатган. Бир йиллик товар айланиши 1,5 миллиард еврони ташкил этган бўлса, шундан 150 миллион евро миқдорида соф фойда олган.
Эслатиб ўтамиз, Ўзбекистон Республикаси Президентининг 2018 йил 27 ноябрдаги «Ўзбекистонда фуқаро авиациясини тубдан ислоҳ қилиш тўғрисида"ги фармонига мувофиқ «Ўзбекистон ҳаво йўллари» МАК негизида 2 та компания «Uzbekistan airways» ва «Uzbekistan airports» акциядорлик жамиятлари ташкил этилди.
