Ўзбекистонда Франция билан ҳамкорликда Uzenergoengineering-Assystem қўшма корхонаси ташкил қилинмоқда, дея хабар қилди Ўзбекистон Энергетика вазирлиги матбуот хизмати. Мазкур қўшма корхона инновацион технологиялардан фойдаланган ҳолда барча турдаги электр тармоқлари ва энергетик объектларини лойиҳалаш билан шуғулланади.

Бу ҳақдаги битим 24 сентябрь куни Ўзбекистон Энергетика вазирлигида Assystem Engineeringand Operation Services S.A.S. компанияси (Франция) вакиллари билан учрашувда имзоланди.

Қўшма корхона Франциянинг ҳамкор компанияси ва «Ўзэнергоинжиниринг» билан биргаликда ташкил этилади ва у Ўзбекистонда масъулияти чекланган жамият шаклида фаолият юритади.

Uzenergoengineering-Assystem қўшма корхонасининг фаолияти барча турдаги электр тармоқлари ва энергетик объектларини лойиҳалашда инновацион технологиялар ва замонавий фан ютуқларига асосланади.

Март ойида «Ўзатом» агентлиги ва Assystem қўшма инжиниринг корхонасини очиш имкониятлари тўғрисида хабар қилинган, улар Ўзбекистон ядро инфратузилмаларини ривожлантириш ҳамда ушбу соҳа учун кадрлар тайёрлаш масаласида ҳамкорликни йўлга қўйган эди.