Ўзбекистон Монополияга қарши курашиш қўмитаси «Ўзстандарт» агентлигига Вазирлар Маҳкамасининг истеъмолчилар ҳуқуқларини ҳимоя қилиш бўйича қўшимча чора-тадбирлар тўғрисидаги қарори лойиҳасининг айрим бандларини қайта кўриб чиқишни тавсия қилди.

«Ўзстандарт» агентлиги томонидан тайёрланган ҳужжат 19 сентябрь куни жамоатчилик муҳокамаси учун эълон қилинган бўлиб, унда қуйидаги бандлар ҳам ўрин олган:

  • тегишли миллий белги билан маркаланмаган маҳсулотлар савдосини тақиқлаш. Ҳар бири бир нечта товарни ўз ичига олган 102 та банддан иборат мажбурий сертификатланиши лозим бўлган маҳсулотлар рўйхати;
  • аввал қўлланилган автомобиль ва қишлоқ хўжалиги техникалари шиналари, автотранспорт воситалари учун эҳтиёт қисмлар, тўқимачилик ва енгил саноат маҳсулотлари, электромаиший техника импортини тақиқлаш;
  • электр истеъмол қилувчи маҳсулотларни олиб киришга фақатгина мамлакат ҳудудларида энг камида битта хизмат кўрсатиш маркази бўлган ишлаб чиқарувчи завод (расмий дилер) ваколатхонасига рухсат берилади. Янги тартиб жорий этиладиган электротехникалар рўйхатидан музлаткичлар, кондиционерлар, вентиляторлар, идиш-товоқ ва кир ювиш машиналари, чангюткичлар, уяли алоқа воситалари ва бошқалар ўрин олган.

Янги тартиблар қарор лойиҳаси қабул қилинган тақдирда. 2020 йилнинг 1 январидан кучга киради.

«Ўрганиш натижалари бўйича, ҳужжат лойиҳасида юридик ва жисмоний шахсларни, тадбиркорлик субъектларини манфаатларига зид келувчи шунингдек рақобат муҳитига таъсир кўрсатиши мумкин бўлган ҳолатлар назарда тутилгани аниқланди», — дейилади қўмита хабарида.

Хусусан, лойиҳанинг 2 бандида маҳсулотни сертификация қилишда маҳсулотнинг айнан шу тури учун аккредитациядан ўтган синов лабораторияси (синов тури) йўқ бўлган тақдирда, сертификат берувчи орган натижаларни ҳаққонийлигини таъминлаш имкониятига эга бўлган синов шартларини, синов ўтказиладиган жойни белгилаши мумкин деб айтилган.

Қўмитанинг фикрича,сертификация берувчи органнинг иҳтиёрига қараб синов лабораториясини танлаш, ҳамда буюртмачининг иштирокисизсинов шартларини белгилашкоррупцияга олиб келиши мумкин. Бу борада қўмита томонидан сертификат берувчи орган буюртмачи билан келишган ҳолда синовларни ўтказиш имконияти, жойи ва шартларини белгилаши мақсадга мувофиқ бўлиши тўғрисида таклиф берилди.

Юқорида қайт этилганлардан келиб чиққан ҳолда, лойиҳада назарда тутилган шартлар ишлаб чиқарувчи заводнинг харажатларини кўпайиши, бозор иштирокчиларининг сонини қисқариши, шунингдек истеъмолчиларнинг манфаатларига таъсир кўрсатиши мумкинлигини ҳисобга олган ҳолда, Қўмита томонидан ушбу бандни чиқариб ташлаш таклиф қилинди.

Монополияга қарши курашиш қўмитаси томонидан ҳужжат лойиҳасини ишлаб чиқарувчи — «Ўзстандарт» агентлига ўзининг тегишли таклифларини тақдим этди.