Жорий йилнинг 13−14 сентябрь кунлари Наманганда «ХХI асрда тиббиёт ва фармацевтиканинг ривожланишида инвестициялар ва инновацияларнинг роли» мавзуида халқаро конференция бўлиб ўтди. Бу ҳақда «Халқ сўзи Online» хабар берди.

Анжуман кейинги иш куни доирасида Ўзбекистон ҳукумати, Наманган вилояти ҳокимлиги ва бир қатор хорижий тиббий компанияларнинг вакиллари иштирокида тор доирадаги музокаралар ўтказилди. Унда, айниқса, Кувайтнинг дунёга машҳур «Mutawa trade», «Amsterdam international trading CO», «Biziness rekordes» компаниялари билан мулоқотлар самарали кечди.

Бундан ташқари хорижий инвесторлар билан вилоятдаги бир қатор тиббиёт муассасаларида даволаш ва диагностика соҳасида илғор технологияларни жорий этиш, фармацевтика корхоналари билан ишлаб чиқариш ва савдо бўйича ҳамкорликни кенгайтириш юзасидан мулоқотлар олиб борилди. Натижада Австрия, Германия, Исроил, Миср, Покистон, Россия, Словакия, Украина, Ҳиндистон ва Хитой компаниялари билан умумий қиймати 92,7 млн. долларлик 22 та муҳим келишувга эришилди ва битимлар имзоланди.

Жумладан, «Косонсой фарм» эркин иқтисодий зонасида фаолият юритувчи «Спринг фармацевтик» МЧЖ ҳамда Миср Араб Республикасининг «Pharco pharmaceuticals corporation» компанияси ҳамкорлигида 30 млн. долларлик фармацевтика маҳсулотларини ишлаб чиқариш, вилоят соғлиқни сақлаш бошқармаси ҳамда Австриянинг «AME International GmbH» компанияси ўртасида 10 млн. долларлик қийматдаги кардиология марказини барпо этиш, «Мерримед Фарм» МЧЖ билан Германиянинг «Textima Export Import GmBH» компанияси ўртасида 30 млн. долларлик кўп тармоқли замонавий тиббий марказ ташкил этиш бўйича келишувларга эришилди.