Жангарилар томонидан 15 сентябрь куни эрталаб шимолий Боғлон провинциясида иккита электр узатиш линиясининг икки устуни портлатилгани сабабли Ўзбекистондан Афғонистоннинг 11 та провинцияси, жумладан Кобулга электр энергияси импорти кескин қисқарди, дея хабар қилди TOLOnews телеканали.

Ушбу электр энергиясининг катта қисмидан Кобул шарқидаги саноат зоналаридаги фабрикалардан фойдаланилади. Пойтахт аҳолиси ҳукуматни бу каби ҳолатларни бартараф этиш учун зарур инфратузилмаларни яратиш лаёқатига эга эмаслигида айбламоқда, дея қайд этди телеканал.

Апрелда жангарилар Туркманистондан электр энергияси етказиб берилаётган электр узатиш линиясига зарар етказган эди.

Эслатиб ўтамиз, Ўзбекистон қарийб 200 километрлик «Сурхон — Пули-Ҳумри» электр узатиш линияси қурилишига 45 млн доллар ажратади. Лойиҳанинг умумий қиймати 110 млн долларга баҳоланмоқда. Мамлакатлар ўртасида «ол ёки тўла» тамойили бўйича 10 йил муддатга энергия етказиб беришга шартнома имзолайди.

«Ўзбекистон миллий электр тармоқлари» компанияси Афғонистонда электр узатиш тармоқлари (тармоқ устунлари) портлатилгани ҳақида Афғонистондаги харидорлардан ҳеч қандай маълумот ёки хабар келиб тушгани йўқлиги ҳақида хабар қилди. Амалдаги шартнома асосида Афғонистонга узулишларсиз электр энергияси етказилиб бермоқда (1 суткада тахминан 1,5 млн. КВт/соат).

Айни пайтда, компаниянинг қайд этишича, 14 сентябрь соат 14:00дан кейин Ўзбекистондан Афғонистонга узатилаётган энергия миқдорини қабул қилиш даражасида кескин тушиш ҳолати рўй берган. Бу одатдагида қарийб 3 марта кам эканлиги қайд этилган.

«Айрим сабабларга кўра таъминоти узилган электр тармоғи, тахминимизча, Афғонистон истеъмолчилари Тожикистон Республикасидан харид қиладиган ҳаво линияларида содир бўлган бўлиши мумкин. Агар ушбу тахмин тўғри бўлса, тожикистонлик ва афғонистонлик мутахассислар таъмирлаш ишларини қачон ва қай тартибда амалга оширишидан бехабармиз», — дейилади хабарда.