Бундан икки ой олдин «Навбаҳор» бош мураббийлигидан бўшатилган россиялик Андрей Канчельскис яна ўз лавозимига қайтарилди. 50 ёшли мутахассис билан уч йиллик шартнома имзоланди, дея хабар беради клуб матбуот хизмати.
Таништирув маросимида Наманган вилоят ҳокими, вилоят футбол ассоциацияси президенти Хайрулло Бозоров сўзга чиқиб бош мураббий Андрей Канчельскисни алмаштириш хатолик бўлганлигини таъкидлади.
Бундан ташқари, Хайрулло Бозоров сербиялик мутахассис Деян Журжевичнинг «Навбаҳор»да омади келмаганлиги, томонларнинг ўзаро келишувига биноан у билан тузилган шартнома бекор қилиниб, Журжевич истеъфога чиқарилганлиги, россиялик мутахассис Андрей Канчельскис яна жамоа бош мураббийи лавозимига қайтарилганлигини таъкидлаб, Канчельскисни «Яна «Навбаҳор»га хуш келибсиз», дея қутлади.
Шу кунгача «Навбаҳор» ПФК вице-президенти сифатида фаолият юритган Бахтиёр Исакжанович Усманов бошқа ишга ўтиши муносабати лавозимидан озод этилди. Янги вице-президент сифатида тадбиркор Ойбек Саматов таништирилди.
