UzAuto Motors компанияси 1.5 л. Turbo двигателли янгиланган Malibu Facelift автомобили савдоси бошланаётганини маълум қилди, дея хабар берди компания матбуот хизмати. Янгиланган Malibu Ўзбекистон бозорида Malibu 2.5л. ўрнини эгаллайди ҳамда унинг янги технологик ва тежамкор (30%) давомчиси бўлади.

Олдузатмали автомобиль аввалгисидан 100 килограммга енгил эканлигига қарамай, унинг узунлиги тахминан 12 сантиметрга ошган. Бундай натижага унинг 1,5 литрли 160 от кучига эга турбомотори сабабли эришилган.

«Шуни қайд этиш лозимки, мазкур моделнинг нархи аввалгисидан 5 миллион сўмга арзон ва у иссиқ иқлимли мамлакатлар учун айни муддао саналади. Янгиланган моделнинг ранглар палитраси ҳам кенг доирада тақдим этилган. Дарвоқе, ушбу модель гўзал аёлларимиз учун ҳам жуда мос келади», — дейилади хабарда.

Шунингдек айни дамда янгиланган Facelift Malibu Turbo 2 л. автомобилининг ҳам савдоси йўлга қўйилган. Ушбу моделдаги автомобилларни етказиб бериш 2019 йилнинг сентябрь ойидан бошланади.

Харидорларнинг Malibu автомобилига бўлган талаби катталигини инобатга олган ҳолда UzAuto Motors Асака банки, InfinBank va Ўзавтосаноат-лизинг билан биргаликда автомобилни байрамона акция шартларида харид қилиш таклиф этилмоқда.

«Харидорларга шуни маълум қиламизки, ҳозирги вақтда Malibu 2.5л. автомобили жуда оз миқдорда чегараланган ранглар палитрасида қолган ва ушбу модель ишлаб чиқаришдан тўхтатилмоқда», — дея маълум қилди компания.

Компания дилерлар билан биргаликда Malibu2.5 л. автомобили учун шартнома тузган мижозлар олдидаги мажбуриятларини тўлиқ ва ўз вақтида бажарилишини кафолатлашини маълум қилди.