Европа Иттифоқи «Жаслиқ» колониясининг ёпилишини олқишлаб, буни қамоқхоналарда бошқарувни яхшилаш сари ташланган қадам деб атади.
«ЕИ пенитенциар тизимда БМТнинг қийноқ ва жазонинг бошқа шафқатсиз, ғайриинсоний ёки қадр-қимматни топтовчи турларига қарши Конвенцияси факультатив протоколини ратификация қилиш асосида пенитенциар тизимдаги ислоҳотларни амалга оширишини ҳамда омбудсманнинг энг яхши халқаро тажрибаларга мувофиқ равишда Миллий превентив механизми функциясини бажариш бўйича ваколатларининг кенгайтирилишини кутмоқда», — дейилади Евроиттифоқ баёнотида.
Чет эллик ва ички иқтисодий операторларнинг амалга оширилаётган ислоҳотларга ишончи ҳамда уларнинг Ўзбекистон иқтисодиётига сармоя киритишга тайёрлиги қонун устуворлиги ва инсон ҳуқуқларига риоя этилиши соҳасидаги доимий ўсишга боғлиқ, дея қайд этди ЕИ.
«ЕИ келгусида муносабатларимизни янги даражага кўтарувчи бундай ҳодисаларни қўллаб-қувватлашга тайёр», — дея таъкидланади баёнотда.
