Январдан 5 августга қадар Самарқанд вилоятида 29 та қизамиққа чалиниш ҳолати қайд этилди, гумонланган жами ҳолатлар эса 419 тани ташкил этди, дея хабар қилди Ўзбекистон Соғлиқни сақлаш вазирлиги матбуот хизмати.
Самарқанд вилоятида қизамиққа чалинишга асосий сабаб — қизамиқ вирусининг хориждан ташиб келтирилишидир, дея қайд этди ССВ. Қизамиқни бартараф этиш ва келгусида тарқалишининг олдини олиш учун беморлар билан алоқага киришган 11,1 минг киши эмланди. Ўлим ҳолатлари қайд этилмади.
Аввалроқ маҳаллий ва хорижий ОАВда Самарқандда қизамиқ эпидемияси тарқалгани хабар қилинган эди. «Самаркандский вестник» нашри вилоят соғлиқни сақлаш бошқармаси маълумотига таянган ҳолда қизамиққа чалингани гумон қилинаётган 391 бемор, касаллик тасдиқланган 31 та ҳолат ҳақида хабар қилди.
Жаҳон соғлиқни сақлаш ташкилоти Ўзбекистонга қизамиқ хориждан ташиб олиб кирилганини тасдиқламоқда, дейилади хабарда. 2018 йилда мамлакат бўйлаб 22,3 минг киши қўшимча равишда эланган эди.
ССВ 2017 йилда Ўзбекистон қизамиқ ва қизилча касалликларидан ҳоли ҳудуд тўғрисида ЖССТ сертификатини олганини эслатиб ўтди. Унга кўра, мамлакат учун ҳар юз минг аҳолига 2 та қизамиққа чалиниш ҳолатининг тасдиқланиши индикатор кўрсаткич ҳисобланади.
«Бугунги кунда бизда бундай кўрсаткич кузатилгани йўқ. Айни вақтда мамлакатга қизамиқдан ҳоли ҳудуд мақомини сақлаб қолиш учун барча чораларни кўриш таклиф этилмоқда», — дея қайд этди ССВ.
Қизамиқнинг кенг тарқалишига йўл қўймаслик учун вазирлик қўшимча равишда 100 минг доза қизамиқ вакцинаси билан таъминланди. Ушбу вакциналар билан жойларда беморлар билан алоқага киришган шахслар эмланади. Шунингдек эпидемиологик назорат кучайтирилган.
