Ўзбекистон президенти Администрацияси ва бош вазир Абдулла Арипов ишдан бўшатилиши лозим бўлган вилоят ҳокимини танлаши лозим. Президент Шавкат Мирзиёев 2 август куни кичик бизнес ва тадбиркорликни ривожлантириш ҳамда бутун республикада кўчмас мулкларнинг бузилишига бағишланган видеоселектор йиғилишида ушбу топшириқни берди.
Аввалроқ давлат раҳбари Хоразм вилояти ҳокими Зафар Эрманов ва Фарғона вилояти ҳокими Шуҳрат Ғаниевни танқид қилгани ҳақида ёзган эдик.
«Шунинг учун Арипов ва Низомиддиновга топшириқ: қайси вилоят ҳокимини ишдан олиш бўйича таклиф берасизлар. Мен яна бир марта такрорлайман: бундай зўравонлик сиёсати билан биз узоққа бора олмаймиз. Агар зўравонлик сиёсати фойдали бўлганида 30 йилда зўр бўлиб кетган бўлар эдик. Эрмановнинг қилган қилиғи, Рўзиевнинг қилган хиёнати — бу маданиятсизлик», — деди президент.
Шавкат Мирзиёев Абдулла Ариповга ҳар уч ҳоким — Фарҳод Эрманов, Зафар Рўзиев, Шуҳрат Ғаниев — интернетда мурожаат билан чиқишини топширди.
«Энди учови Интернет орқали мурожаат қилсин, Абдулла Негматович! Рўзиев ҳам, Эрманов ҳам, Ғаниев ҳам — ҳаммаси. Қандай қилиб мурожаат қилишини сиз ўзингиз айтинг. Бутун элга айтсин: Ўзбекистонни ундай деб ўйламанглар, мен аҳмоқлик қилганман, мен хиёнат қилганман, деб. Миллат эмас, мамлакат эмас, давлат эмас, деб. Керак бўлса ўша блогерларни йиғсин, блогерларга ўзлари ҳисобот беришсин», — деди Шавкат Мирзиёев видеоселекторда.
